Лінкі ўнівэрсальнага доступу

Памежная зона зь Беларусьсю — захады супроць «Ісламскай дзяржавы» — пасол Расеі Сурыкаў


Аляксандар Сурыкаў

«Сорамна за думкі вакол манэўраў»

Тры тысячы расейскіх вайскоўцаў возьмуць удзел у сумесных манэўрах «Захад-2017», якія пройдуць у Беларусі ў верасьні, і будуць выведзеныя адразу пасьля заканчэньня манэўраў, ужо ў верасьні.

У гэтым запэўніў журналістаў пасол Расеі Аляксандар Сурыкаў на прэсавай канфэрэнцыі, прымеркаванай да дзяржаўнага сьвята Расейскай Фэдэрацыі — Дня Расеі.

«Часам становіцца сорамна, што такія думкі могуць узьнікнуць», — сказаў Сурыкаў адносна меркаваньняў, што расейскія вайскоўцы плянуюць і надалей застацца ў Беларусі.

Паводле амбасадара, падобныя манэўры праводзяцца па чарзе на тэрыторыі дзьвюх краін, і калі манэўры праходзяць у Расеі, не стаіць пытаньня, што беларускія вайскоўцы «акупуюць Расею».

«Пасьля манэўраў усе войскі выводзяцца на кватэры. Да зімы трэба рыхтавацца, чаго ім тут сядзець?» — сказаў Аляксандар Сурыкаў пра расейскія часткі, якія прыедуць у Беларусь для ўдзелу ў манэўрах «Захад-2017».

Якія ёсьць праблемы ў адносінах Беларусі і Расеі?

Амбасадар прызнаў, што ёсьць праблемы ў пастаўках мяса-малочнай прадукцыі Беларусі ў Расею, але зазначыў, што гэтыя праблемы паступова вырашаюцца. На пытаньне, ці могуць беларусы замест расейскага рынку пераарыентавацца на кітайскі, пасол Сурыкаў адрэагаваў гэтак:

«Ня ведаю, хто куды пераарыентуецца».

Паводле Сурыкава, як фэрмэры на Захадзе, гэтак і сяляне ў Кітаі «не чакаюць нас з вамі, яны сваё малако хочуць вырабляць».

Аляксандар Сурыкаў мяркуе, што бліжэйшым часам Эўразійская эканамічная камісія ўрэгулюе пытаньні наконт наяўнасьці ў беларускім малацэ антыбіётыкаў, што выклікае прэтэнзіі Рассельгаснагляду. Пакуль камісія дазваляе ўжываньне ў малацэ толькі 4 антыбіётыкаў, а ў Беларусі дазволена ўжываньне ажно 57.

Таксама амбасадар Сурыкаў прызнаў, што цыклічна паміж краінамі ўзьнікаюць нафтагазавыя спрэчкі, і выказаў надзею, што да 2025 году, калі ўсталюецца нафтагазавы рынак, гэтыя спрэчкі ўрэгулююцца.

«Хацелася б, каб яны вырашаліся праз рашэньні судоў. Але пакуль пераадольваем гэтак, як пераадольваем — праз дамовы на вышэйшым узроўні», — сказаў Аляксандар Сурыкаў.

Памежная зона зь Беларусьсю — захады супроць ІДзІЛ

Аляксандар Сурыкаў гэтак патлумачыў увядзеньне Расеяй памежнай зоны на мяжы зь Беларусьсю і захады адносна пасажыраў зь Беларусі, якіх цалкам перавялі ў міжнародныя калідоры кантролю ў расейскіх аэрапортах.

«Адкрытая мяжа з Расеяй часткова можа выкарыстоўвацца ІДзІЛ, у тым ліку з улікам бязьвізавага рэжыму, які Беларусь увяла для 80 краін. Таму мы мусілі перавесьці ў міжнародныя тэрміналы рэйсы зь Менску. Пасажыры праходзяць праз памежны кантроль, дзе паказваюць пашпарт», — сказаў Сурыкаў і згадаў, што нядаўна сам гэтак ляцеў у Маскву зь Менску.

Пры гэтым Аляксандар Сурыкаў прызнаў, што яшчэ не да канца вырашаная тэхнічная праблема са сканаваньнем пашпартоў і праблема з памежным кантролем пасажыраў чартэрных рэйсаў — прыкладам, калі ў Расею ляцяць некаторыя беларускія працаўнікі. «Памежныя службы над гэтым працуюць», — запэўніў амбасадар.

Дальнабойшчыкам зь Беларусі дазволяць езьдзіць па беларускіх пасьведчаньнях

«Пасьпяшаліся. Ня ўсё ўлічылі», — сказаў Аляксандар Сурыкаў наконт новаўвядзеньня, паводле якога ўсім дальнабойшчыкам, якія працуюць у Расеі, трэба атрымаць расейскія пасьведчаньні кіроўцы. Сурыкаў мяркуе, што ўжо восеньню дэпутаты Дзяржаўнай Думы павінны дапрацаваць адпаведны закон, а пакуль дазвол беларускім кіроўцам карыстацца беларускімі правамі павінен даць расейскі ўрад.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG