Прэзыдэнт Польшчы Анджэй Дуда заявіў, што падтрымлівае ідэю правядзеньня рэфэрэндуму, на якім палякі змогуць выказацца наконт прыёму Польшчай уцекачоў.
У той жа час Дуда падкрэсьліў, што галасаваньне можа адбыцца толькі ў 2019 годзе, у тым выпадку, калі пытаньне яшчэ будзе актуальным да таго часу.
Пакуль дакладна невядома, як менавіта можа быць сфармуляванае пытаньне на рэфэрэндуме.
Падобны рэфэрэндум у мінулым годзе ўжо правяла Вугоршчына. Вугорцы пераважнай большасьцю прагаласавалі супраць перасяленьня ўцекачоў зь іншых краінаў ЭЗ, але галасаваньне ня мела юрыдычнай сілы з-за нізкай яўкі выбаршчыкаў.
Чэхія — яшчэ адна краіна, якая выступае супраць перасяленьня ў сваю краіну ўцекачоў. Як мы паведамлялі, Мальта, якая старшынюе ў ЭЗ, прапануе расцэньваць як парушэньне правілаў Эўрапейскага зьвязу, чэскае рашэньне адмовіцца ад выкананьня ўстаноўленых квотаў і спыніць прыём уцекачоў.
У рамках зацьверджаных квот да верасьня 2017 году Чэская Рэспубліка павінна была прыняць 2600 чалавек. Аднак рэальна да сёньняшняга дня было пераселена толькі 12 уцекачоў.
У сувязі з адмовай ад прыёму ўцекачоў Чэхіі пагражае разьбіральніцтва ў судзе Эўразьвязу і штраф за парушэньне дзеючых правілаў. Непадпарадкаваньне пагражае Чэхіі штрафам у памеры некалькіх мільёнаў эўра.