Беларусь разьлічвае захаваць тэмпы росту прамысловай вытворчасьці ў сувязі з аднаўленьнем паставак расейскай нафты.
«За 2 месяцы рост прамвытворчасці — 3,1%, за тры — 3,3%, з пачатку году прырост склаў 5,4%. Я спадзяюся, што мы можам захаваць гэты ўзровень да канца году, хоць паказчык даведзены значна ніжэйшы», — цытуе віцэ-прэмʼера Ўладзімера Сямашку Інтэрфакс.
Па словах намесьніка прэмʼер-міністра, пунктам росту ў прамысловасьці стане нафта.
«Другое паўгодзьдзе значна больш эфэктыўна будзе працаваць „Белнафтахім“ у адносінах да мінулага году. Вы памятаеце, рэзка зьнізіліся пастаўкі нафты, у разьліку дзесьці па 4 мільёны тон у квартал атрымлівалася. За другое паўгодзьдзе 2016-га перапрацавалі менш за 8 мільёнаў тон нафты», — сказаў Уладзімер Сямашка.
Ён дадаў, што ў гэтым годзе на перапрацоўку будзе пастаўлена 18 мільёнаў тон расейскай нафты, сяреднеквартальная перапрацоўка ў трэцім-чацвёртым квартале будзе 5,3–5,4 мільёна тон«.
Таксама Ўладзімер Сямашка не выключае, што сёлета ў Беларусь можа быць пастаўлена нафта і не з Расеі.
Раней старшыня «Белнафтахіму» Ігар Ляшэнка казаў, што прапрацоўваюцца магчымасьці дывэрсыфікацыі паставак нафты ў Беларусь:
«Ня ў піку Расеі, але дывэрсыфікацыя заўсёды зьяўляецца падушкай бясьпекі для эканамічнай устойлівасьці любой галіны».
Канкрэтных краін і шляхоў паступленьня ён не назваў — маўляў, «камэрцыйная таямніца».