Лінкі ўнівэрсальнага доступу

Рыбакі-аматары супраць арэнды Прыпяці — сёньня ў Мазыры аўкцыён


Пратэст з вудамі

У Мазыры мясцовыя рыбакі пратэставалі супраць перадачы ў арэнду 91 кілямэтра ракі Прыпяць. Аўкцыён па вызначэньні арандатара Мазырскі райвыканкам на даручэньне Гомельскага абласнога выканаўчага камітэту прызначыў на сёньня, 22 траўня.

Напярэдадні апоўдні на левы бераг прыйшлі мясцовыя аматары рыбнай лоўлі, наклеілі на вопратку на сьпіне налепкі «Супраць арэнды р. Прыпяць» і закінулі вуды.

Арсеньці
Арсеньці

Сталага веку мазырчук, які назваўся Арсеньціем, тлумачыць:

«Арэнда гэтая, як і вайна, — горш не прыдумаеш. Трэба скасаваць усё гэта: увесь горад супраць. На Прыпяць ідуць і едуць адпачыць работнікі ці ня ўсіх прадпрыемстваў — сользаводу, НПЗ, будаўнічых трэстаў. Пэнсіянэры сядзяць з вудамі, нават васьмідзесяцігадовыя. А здадуць у арэнду — да ракі й не падступісься».

Налепкі супраць перадачы Прыпяці ў арэнду прымацоўвалі на сябе й маладыя гараджане.

Дваццацідвухгадовы Андрэй — сантэхнік, працуе на будоўлі. Тлумачыць, што аматарскай рыбалкай заняўся летась. Прыходзіць на Прыпяць, каб адпачыць:

«Нельга здаваць у арэнду. Нам кажуць, што пакінуць у межах гораду ўчастак і здаваць у арэнду ня будуць. Але ж гэта не ратуе сытуацыю, бо рыбаловаў-аматараў у Мазыры багата. Людзі выяжджаюць і за межы гораду. А вясковыя жыхары? Ім як прывыкнуць, што да Прыпяці бяз грошай нельга падысьці?».

Каардынатар грамадзянскай ініцыятывы «Зялёны дазор» Павал Наздра кажа, што ў людзей няма грошай, каб аплачваць яшчэ й аматарскую рыбалку на Прыпяці. Для многіх рака — гэта яшчэ й магчымасьць выжыць у цяперашняй складанай эканамічнай сытуацыі.

Павал Наздра
Павал Наздра

«Мясцовыя ўлады цьвердзяць, што ў ракі павінен быць гаспадар, — кажа Наздра. — Але раку каля Мазыра перадавалі ўжо ў арэнду прадпрыемству водных шляхоў „Ніжняпрыпяцкае“. Таксама ледзь не залатыя горы абяцалі — і ўзнаўленьне рыбы будзе, і ўладкаваньне месцаў адпачынку. А яны нават браканьерствам займаліся. Пасьля прамысловага адлову аматару ў рацэ цяжка рыбіну злавіць — усё выграбалі. Не сакрэт, што многія людзі, у каго заробкі мізэрныя альбо іх наагул няма, харчуюцца з ракі й гэткім чынам выжываюць».

Адзін з рыбакоў, які прыехаў зь сябрамі ў нядзелю на левы бераг Прыпяці парыбачыць, зьдзіўляецца рашэньню ўладаў:

«Я разумею, калі ў арэнду здаюць возера ці які вадаём — яго можна зарыбіць, прасачыць, як узнаўляецца рыба. А тут плынь. Не разумею, як плаціць грошы толькі за тое, каб закінуць ў рэчку вуду? Няправільна гэта».

У Мазыры, як толькі даведаліся зь невялічкага паведамленьня ў мясцовай газэце пра здачу ў арэнду амаль ста кілямэтраў ракі, пачалі зьбіраць подпісы пад зваротам у афіцыйныя органы.

Дзьмітры Багачоў
Дзьмітры Багачоў

«Каля пяці тысяч гараджанаў падпісаліся супраць перадачы ў арэнду Прыпяці, — паведаміў прадстаўнік пратэставага руху супрацьдзеяньня здачы ракі ў арэнду Дзьмітры Багачоў. — Накіравалі зварот у Мазырскі райвыканкам і Гомельскі аблвыканкам, у Адміністрацыю прэзыдэнта, у Генэральную пракуратуру. Удалося датэлефанавацца да міністра прыродных рэсурсаў і аховы навакольнага асяродзьдзя Андрэя Каўхуты. Адказаў нам пакуль толькі мясцовы райвыканкам, заявіўшы, што дзейнічае на даручэньне Гомельскага аблвыканкаму».

Суразмоўца дадае, што налепкі супраць здачы ў арэнду Прыпяці расходзяцца, як гарачыя піражкі — гараджане набываюць іх за грошы, прыклейваюць на задняе шкло сваіх аўтамабіляў.

Мазырчук Генадзь Самойлік стварыў адмысловую суполку «Рыбалка ў Мазыры» ў сацыяльнай сетцы «УКантакце», дзе інтэрнэт-карыстальнікі таксама не ўхваляюць рашэньня ўладаў.

І яны супраць
І яны супраць

Найпершым прэтэндэнтам на арэнду азначанага ўчастка Прыпяці і 302 гектараў пойменных азярын выступае Мазырская раённая арганізацыйная структура Рэспубліканскага дзяржаўна-грамадзкага аб’яднаньня «Беларускага таварыства паляўнічых и рыбаловаў». Інфармацыя наконт гэтага зьмешчаная на сайце райвыканкаму і ў мясцовай афіцыйнай газэце. Названая і цана Прыпяці: 1 базавая велічыня (23 рублі) за кілямэтар вадацёку, 2 рублі 30 капеек за гектар пойменных азярын, 302 гектары якіх таксама перадаюць у арэнду.

Рака Прыпяць каля Мазыра
Рака Прыпяць каля Мазыра

Гараджане толькі дзіву даюцца: якім чынам арганізацыя, ня маючы сродкаў, будзе акультурваць Прыпяць?

Раку Прыпяць сталі дзяліць паміж арандатарамі яшчэ ў 2005 годзе, калі быў падпісаны ўказ № 580. І піянэрам у гэтай справе выступіла прыналежная да Кіраўніцтва спраў прэзыдэнта экспэрымэнтальная лесапаляўнічая гаспадарка «Ляскавічы» — яна высокім дашчаным плотам аддзяліла жыхароў вёскі Дарашэвічы Петрыкаўскага раёну ад Прыпяці дзеля арганізацыі турыстычнага комплексу.

Неўзабаве Петрыкаўскі райвыканкам перадаў у арэнду 23 кілямэтры Прыпяці і 555 гектараў вадаёмаў таварыству з абмежаванай адказнасьцю «Аграрна-турыстычная паляўніча-рыбалоўная гаспадарка «Тарока». Цяпер гаспадарка прапануе палешукам аднаразовую аматарскую рыбалку за 18 рублёў.

Ваша меркаваньне

Паказаць камэнтары

XS
SM
MD
LG