Лінкі ўнівэрсальнага доступу

Прэзыдэнт Сэрбіі Томіслаў Нікаліч прыбыў у Беларусь рэйсавым самалётам


Прэзыдэнт Сэрбіі Томіслаў Нікаліч

На такую дэталь афіцыйнага візыту зьвярнулі ўвагу карыстальнікі сацсетак. Паводле праграмы, Аляксандр Лукашэнка ўзнагародзіць кіраўніка Сэрбіі ордэнам Дружбы народаў «за значны ўклад ва ўмацаваньне міру, сяброўскіх стасункаў і супрацоўніцтва паміж Беларусьсю і Сэрбіяй», паведамляе БелТА.

Сустрэча Аляксандра Лукашэнкі і Томіслава Нікаліча адбудзецца 18 траўня.

Дзяржаўнае інфармацыйнае агенцтва БелТА паведамляе, што пасьля падпісаньня міжурадавага пагадненьня пра свабодны гандаль паміж Беларусьсю і Сэрбіяй у 2009 годзе гандлёвы абарот вырас амаль у 5 разоў. Цяпер ён складае больш за 250 мільёнаў даляраў.

У студзені 2017-га стала вядома, што Беларусь перадасьць Сэрбіі два дывізіёны (12 самаходных установак) зэнітна-ракетных комплексаў «Бук» і два зьвяны (восем самалётаў) шматмэтавых зьнішчальнікаў чацьвёртага пакаленьня МіГ-29 з умовай, што Бялград аплаціць іх рамонт і мадэрнізацыю. Як паведаміў у ноч зь пятніцы на суботу міністар абароны Сэрбіі Зоран Джорджавіч, вярнуўшыся з паездкі ў Менск, пастаўка тэхнікі адбудзецца ў 2018 годзе.

Нікаліч ня раз публічна падтрымліваў кіраўніка Беларусі. Падчас апошняга візыту ў 2015 годзе ён рэзка крытыкаваў палітыку санкцый у дачыненьні да беларускіх уладаў.

Гэта адзін з апошніх афіцыйных візытаў Томіслава Нікаліча ў якасьці прэзыдэнта краіны. Тэрмін выкананьня ягоных абавязкаў сканчаецца 31 траўня 2017-га. Па выніках выбараў у красавіку 2017 году прэзыдэнтам Сэрбіі абраны Аляксандар Вучыч, які раней быў прэм’ер-міністрам краіны.

XS
SM
MD
LG