Лінкі ўнівэрсальнага доступу

Андрэй Бандарэнка патрабуе праз суд прызнаць права на сплату нанесенай яму шкоды


Андрэй Бандарэнка

18 траўня Ленінскі суд Магілёва разгледзіць заяву праваабаронцы Андрэя Бандарэнкі, які патрабуе пакрыцьця маральнай, маёмаснай і фізычнай шкоды, нанесенай яму «незаконнымі дзеяньнямі дзяржорганаў, якія фальсыфікавалі крымінальную справу паводле артыкула 411 Крымінальнага кодэксу Рэспублікі Беларусь».

Андрэй Бандарэнка апавёў карэспандэнту Свабоды:

«Працэдура пакрыцьця шкоды палягае ў наступным. Калі мяне апраўдалі па 411-м артыкуле, я падаю спачатку заяву аб прызнаньні за мной такога права. У прынцыпе гэта фармальнасьць, яны прызнаюць за мной гэта права. Пасьля гэтага я буду ўжо накіроўваць скаргі ў той жа суд, але ўжо не да Ўпраўленьня Сьледчага камітэту па Магілёўскай вобласьці і турмы № 4, а да казны. Паколькі плаціць будзе казна. У далейшым казна мае права выставіць рэгрэсны пазоў, то бок запатрабаваць назад гэтыя грошы ад асобы, якая нанесла гэтую шкоду, за якую казна расплацілася».

Андрэй Бандарэнка згадаў, што калі яго апраўдалі ў 2011 годзе, казна выплаціла яму нанесеную шкоду.

«Першы раз, калі мяне апраўдалі ў 2011 годзе, калі я быў прызнаны невінаватым, мы гэтак жа сама пакрывалі маральную і матэрыяльную шкоду. І казна выплаціла на той час больш за 200 мільёнаў рублёў. Цяпер гэта ў другі раз. Ці было гэта зь некім, хто быў апраўданы па 411-м артыкуле, мне невядома. Але адвакаты кажуць, што гэта ўпершыню ў гісторыі Беларусі».

Праваабаронца Андрэй Бандарэнка лічыць, што мае шанцы выйграць справу. Ён кажа, што маёмасная шкода, напрыклад, за аплату адвакатаў, бясспрэчная:

«А вось маральную шкоду яны аплацяць, проста пытаньне, у якім абʼёме. Бо ў нас паняцьце „маральная шкода“ нідзе ня вызначана і мы павінны проста гэта даказваць. Пасьля таго як за мной прызнаюць права на пакрыцьцё шкоды, у наступных скаргах мы будзем ужо ўказваць канкрэтныя сумы».

«Але больш за любую кампэнсацыю мне хацелася б убачыць на лаве падсудных нахабна-задаволеныя твары супрацоўнікаў ВУ „Турма № 4“. Гэта стала б для мяне самай каштоўнай кампэнсацыяй і поўнай рэабілітацыяй», — напісаў Андрэй Бандарэнка ў фэйсбуку.

XS
SM
MD
LG