Міжнародная праваабарончая арганізацыя Human Rights Watch заклікала расейскія ўлады адмяніць абвінаваўчы прысуд відэаблогеру зь Екацярынбургу Руслану Сакалоўскаму, які быў асуджаны на 3,5 года ўмоўна за «лоўлю пакемонаў» у праваслаўным храме. Праваабаронцы адзначаюць, што ролікі Сакалоўскага маглі абразіць асобных грамадзян Расеі, але дзеяньні чалавека не ўяўляюць грамадзкай небясьпекі, а таму яго крымінальны перасьлед — «гэта неабгрунтаванае абмежаваньне права на свабоду слова».
У Human Rights Watch дадалі, што ў апошнія гады сярод фігурантаў спраў аб «экстрэмісцкай дзейнасьці» ў Расеі ўсё часьцей аказваюцца блогеры, журналісты, апазыцыйныя актывісты, барацьбіты за правы этнічных меншасьцяў, а таксама тыя, хто крытыкуе Рускую праваслаўную царкву. Гэта і, у прыватнасьці, прысуд Сакалоўскаму зьяўляецца «наглядным прыкладам таго, як расейскія ўлады выкарыстоўваюць размытыя нормы антыэкстрэмісцкага заканадаўства для задушэньня свабоды слова і культывацыі самацэнзуры», сьцьвярджаюць праваабаронцы.
Руслан Сакалоўскі быў затрыманы ў верасьні 2016 году. Гэтага чалавека абвінавацілі ў абразе пачуцьцяў вернікаў за тое, што ён гуляў у мабільную гульню Pokemon Go у праваслаўным храме. На мінулым тыдні суд у Екацярынбургу прысудзіў відэаблогеру тры з паловай гады ўмоўнага пазбаўленьня волі і абавязковыя работы. Праваабарончы цэнтар «Мэмарыял» раней прызнаў Руслана Сакалоўскага палітычным зьняволеным.
