Кнігі «Абарона Курапатаў: Народны мэмарыял» і «Добрая фатаграфія» беларускія мытнікі канфіскавалі 27 верасьня 2015 году ў адказнага сакратара ўправы КХП-БНФ Алеся Чахольскага ў Берасьці. Экстрэмісцкай літаратурай кнігі Пазьняка суд прызнаў яшчэ раней. Вярхоўны суд канчаткова пацьвердзіў гэтае рашэньне.
Чахольскі: Нічога нечаканага для нас няма. Змаганьне за Курапаты — гэта змаганьне з КГБ, якое там страляла. Яны ня могуць дараваць Пазьняку, што ён знайшоў цела нябожчыка, рэчавы доказ іх злачынства. Гэтая кніга ёсьць у вольным доступе ў Інтэрнэце. Дык дзякуй за рэкляму гэтак званым экспэртам. Цяпер мы будзе зьвяртацца ў Камітэта па правах чалавека ААН, каб паказаць увесь маразм гэтай улады.
Аўтар кніг, старшыня КХП-БНФ Зянон Пазьняк, распавёў Свабодзе, што лічыць экспэртызу і судовае рашэньне спробай зьнішчыць «доказы злачынства» ў Курапатах.
Пазьняк: Яны то дарогу там рабілі, то крыжы пілавалі, будавалі «Бульбаш-Хол», але нічога ў іх не атрымліваецца. Цяпер яны хочуць туды залезьці пад выглядам дабрадзеяў, каб усё зьнішчыць. Кажуць пра прымірэньне. Няма і ня можа быць ніякага прымірэньня. Гэта тактыка па зьнішчэньні Курапатаў. І рашэньне пра кнігу ў гэтую іх тактыку ўкладаецца. Гэты вэрдыкт суду нічога не мяняе, бо сапраўдныя экстрэмісты — гэта яны самі, гэты рэжым, і іх папярэднікі, якія ўчынілі злачынства ў Курапатах.
«Абарона Курапатаў: Народны мэмарыял» — гэта збор аўтарскіх артыкулаў, успамінаў, матэр’ялаў, фатаграфіяў і перадрукаў пасьвечаных тэме абароны Курапатаў.
«Добрая фатаграфія» — гэта кніга-альбом, якая складаецца з фатаграфіяў і артыкулаў-эсэ пра фатаграфію, разгляд і аналіз выбраных фатаграфіяў ад сярэдзіны ХІХ стагодзьдзя і да 2012 года.
