Лінкі ўнівэрсальнага доступу

На Менскі гарвыканкам падалі ў суд за марудны разгляд заяўкі на Дзень волі


Дзяніс Садоўскі, архіўнае фота

12 траўня Маскоўскі раённы суд Менску разгледзіць скаргу адказнага сакратара Беларускай хрысьціянскай дэмакратыі Дзяніса Садоўскага на неправамоцныя дзеяньні Менгарвыканкаму пры разглядзе заяўкі аб шэсьці на Дзень Волі ў Менску 25 сакавіка.

«Менгарвыканкам груба парушыў заканадаўства пра масавыя мерапрыемствы, ня даўшы своечасова — прынамсі за 5 дзён да Дня Волі — адказ. І гэта немагчыма ніяк кваліфікаваць інакш, як парушэньне. Паглядзім, як Менгарвыканкам у судзе паспрабуе з гэтага выйсьці. Хоць мы і разумеем, што незалежных судоў няма, тым ня менш мы не павінны мірыцца з нахабным парушэньнем закону тымі, хто павінен яго кантраляваць і выконваць», — сказаў сайту bchd.info Дзяніс Садоўскі.

Адказны сакратар Беларускай хрысьціянскай дэмакратыі Дзяніс Садоўскі падаў у суд Маскоўскага раёну скаргу на дзеяньні Менгарвыканкаму пры разглядзе заяўкі аб мітынгу і шэсьці на Дзень Волі.

Чыноўнікі далі адказ на заяўку менш як за дзень да пачатку — пры тым, што паводле закону мусілі адказаць за 5 дзён. Адказ быў адмоўны. На погляд Садоўскага, падстаў для адмовы не было. Рашэньне дазволіць мітынг у парку Дружбы народаў (пазьней вусна забаронены старшынём Менгарвыканкаму) не ўзгаднялася з заяўнікам.

Садоўскі просіць прызнаць рашэньне Менгарвыканкаму незаконным і ўскладае на чыноўнікаў адказнасьць за тое, што ў выніку акцыя прайшла як несанкцыянаваная, а фактычна не была ні забароненая, ні дазволеная законным чынам. У выніку больш за 700 чалавек было затрымана, супраць мірных дэманстрантаў ужывалася грубая фізычная сіла. Каля сотні затрыманых пакаралі штрафамі і адміністрацыйнымі арыштамі.

Заяўку на менскую акцыю на Дзень Волі (шэсьце ад Акадэміі навук да парку Янкі Купалы) падавалі яшчэ 6 студзеня. Празь месяц заяўнікам паведамілі, што заяўка, маўляў, згубілася.

8 лютага падалі наступную заяўку, а працэс яе падачы зьнялі на відэа.

За 5 дзён да правядзеньня акцыі Менгарвыканкам ня даў адказу на заяўку, хоць абавязаны быў зрабіць гэта па законе. Сустрэчу з заяўнікамі ў Менгарвыканкаме некалькі разоў адмянялі і ўрэшце прызначылі на вечар 24 сакавіка. Улады дазволілі правесьці толькі мітынг у парку Дружбы народаў. Заяўнікі адклікалі свае подпісы. А праз 4 гадзіны старшыня Менгарвыканкаму Андрэй Шорац заявіў, што «любыя вулічныя акцыі 25 сакавіка ў Менску будуць незаконнымі».

За акцыю на Дзень Волі былі вынесеныя папярэджаньні партыям БНФ і АГП, а таксама руху «За свабоду». Усе тры абскардзілі папярэджаньні ў Вярхоўны Суд.

XS
SM
MD
LG