Лінкі ўнівэрсальнага доступу

У Беларусі далі справаздачу па забракаваным у Расеі лекавым сродку


Ілюстрацыйнае фота ©Shutterstock

Міністэрства аховы здароўя Беларусі паведаміла, што аналіз умоў вытворчасьці забракаванага ў Расеі лекавага сродку «Пэнтаксіфілін», вырабленага на Барысаўскім заводзе мэдпрэпаратаў, ня выявіў парушэньняў.

Міністэрства зьняпраўдзіла інфармацыю расейскіх СМІ пра тое, што ў беларускіх растворах для іньекцый былі знойдзеныя староньнія часьцінкі.

Паводле Міністэрства аховы здароўя Беларусі, «інфармацыя ў расейскіх СМІ пра неадпаведнасьць лекавага сродку па паказчыку „мэханічныя ўключэньні“ сфармуляваная некарэктна». Беларускі бок сьцьвярджае, што перад выпускам у рэалізацыю лекавы сродак «прайшоў працэдуру дэкляраваньня на тэрыторыі Расейскай Фэдэрацыі ва ўстаноўленым парадку».

Паводле міністэрства, па стане на 5 траўня гэтага году на адрас Барысаўскага заводу ня вернута ніводнай упакоўкі лекавага сродку.

Раней СМІ паведамілі, што Расздароўнагляд па выніках праверак у Мардовіі, Валагодзкай вобласьці і Калінінградзе адклікае недабраякасныя растворы для іньекцый, у якіх нібыта выяўленае шкло і староньнія мэханічныя часьцінкі, паведамляе РИА Новости.

Валагодзкія ўлады паведамілі пра выманьне з абарачэньня няякаснага раствору для іньекцый у ампулах — беларускай вытворчасьці. Як адзначыў прадстаўнік мэдсанчасткі заводу «Поўначсталь», куды паступіў забракаваны раствор, шкла ў ампулах не было.

Як паведамілі ў Расздароўнаглядзе, усяго за 2016-2017 гады былі забракаваныя дзьве сэрыі двух гандлёвых найменьняў лекавых прэпаратаў вытворчасьці РУП «Белмэдпрэпараты» і 14 сэрый сямі гандлёвых найменьняў лекавых прэпаратаў вытворчасьці ААТ «Барысаўскі завод мэдычных прэпаратаў».

«У сувязі з выяўленьнем браку вытворцамі прадстаўленыя ў Расздароўнагляд пляны карэктуючых мерапрыемстваў дзеля прадухіленьня шкоды», — напісана на сайце расейскага ведамства.

Ваша меркаваньне

Паказаць камэнтары

XS
SM
MD
LG