Лінкі ўнівэрсальнага доступу

Намесьнік старшыні АГП Васіль Палякоў, арыштаваны на 15 сутак, абвясьціў галадоўку


Васіль Палякоў, архіўнае фота

Намесьнік старшыні Абʼяднанай грамадзянскай партыі Васіль Палякоў, арыштаваны на 15 сутак Савецкім раённым судом Гомля, абвясьціў галадоўку ў ізалятары часовага ўтрыманьня.

Як паведаміў БелаПАН праваабаронца Леанід Судаленка, такім чынам палітык пратэстуе супраць несправядлівага, на яго думку, арышту, а таксама тайнага разгляду справы.

На судовае паседжаньне, якое адбылося 2 траўня, нікога не пусьцілі, а міліцыянты ў залі суду замкнуліся знутры на ключ. Рашэньне вынесла судзьдзя Алена Шайн, якая і раней асуджала і Васіля Палякова, і блогера Максіма Філіповіча на суткі.

4 траўня палітыка ў ІЧУ наведаў адвакат, каб падпісаць скаргу на незаконнае рашэньне суду. Палякаў сказаў адвакату, што пасьля затрыманьня 1 траўня на яго склалі пратакол нібыта за заклікі да правядзеньня несанкцыянаванага шэсьця, хоць шэсьця 1 траўня ў Гомлі не было, а быў дазволены гарвыканкамам мітынг, пасьля якога і быў затрыманы намесьнік старшыні АГП. На мітынгу Палякоў трымаў бел-чырвона-белы сьцяг.

Другі пратакол — за нібыта непадпарадкаваньне міліцыі — быў складзены 2 траўня. Палякова везьлі з ІЧУ ў суд, і міліцыянты прымушалі яго сесьці ў клетку службовага аўтамабіля. Калі палітык адмовіўся, на яго склалі пратакол. У выніку суд пакараў палітыка 15-суткавым арыштам.

15 траўня сына Васіля Палякова Аляксандра забіраюць на тэрміновую службу. Палітык вызваляецца толькі 16 траўня і ня зможа праводзіць сына ў войска.

У сацыяльных сетках праходзіць акцыя салідарнасьці з арыштаваным «Я такі, як Васіль Палякоў». Карыстальнікі фатаграфуюцца зь бел-чырвона-белым сьцягам і «Пагоняй» на знак падтрымкі намесьніка старшыні АГП.

XS
SM
MD
LG