Актывістка ініцыятывы «Дзея» Аліна Нагорная зьвярнулася па падтрымку ў Міністэрства культуры і Інстытут гісторыі Акадэміі навук з просьбай даць заключэньне аб неабходнасьці ўстаноўкі ў Слуцку помніка ў гонар паўстанцаў — нацыянальных герояў, змагароў за незалежнасьць Беларусі.
Таксама прапанавана мясцовым выканаўчым органам — найперш Салігорскага, Капыльскага і Старадароскага раёнаў, землі якіх адносіліся да Слуцкага павету — спраўдзіць тэрытарыяльны ахоп і зрабіць адпаведныя захады дзеля мэмарыялізацыі памяці слуцкіх паўстанцаў праз устаноўку помнікаў, памятных знакаў і наданьні адпаведных назваў вуліцам.
«Пры абскарджваньні адмоўнага адказу Слуцкага райвыканкаму мы атрымалі адказ зь Менскага абласнога выканаўчага камітэту, у якім гаварылася, што мясцовыя дзяржаўныя органы мусілі прыняць рашэньне ў праблеме паводле заключэньня Міністэрства культуры Рэспублікі Беларусь. Слуцкі ж райвыканкам проста адмахнуўся ад пытаньня і даў адмысловую адпіску ў парушэньне дзейнага заканадаўства, — тлумачыць новы зварот Аліна Нагорная. — Дзеля разгляду звароту па сутнасьці Слуцкаму выканкаму даручана вярнуцца да яго разгляду з прыцягненьнем зацікаўленых дзяржаўных органаў. Прайшло два тыдні, Слуцкі выканкам пакуль маўчыць, і мы вырашылі зьвярнуцца дадаткова ў „зацікаўленыя“ дзяржаўныя органы».
Грамадзкая актывістка спадзяецца, што ў Міністэрстве культуры і ў Інстытуце гісторыі Акадэміі навук разумеюць, што менавіта Слуцкае паўстаньне — яскравая пераканаўчая падзея на шляху змаганьня за незалежнасьць і дзяржаўнасьць Беларусі. А значыць, культурная і палітычная спадчына гэтай велічнай падзеі — моцны гістарычны і ідэалягічны падмурак сучаснай незалежнай Беларусі, важкі аргумэнт у абарону сувэрэнітэту краіны.
Маецца ў звароце і просьба прыцягнуць да абмеркаваньня рашэньня аб абгрунтаванасьці і неабходнасьці ўстаноўкі помніка ў гонар слуцкіх паўстанцаў прадстаўнікоў грамадзкасьці, грамадзянскіх актывістаў, экспэртаў і спэцыялістаў у адпаведнай сфэры.
Аліна Нагорная спадзяецца на пазытыўнае заключэньне Міністэрства культуры і Інстытуту гісторыі, што стане штуршком для пачатку комплексу мерапрыемстваў дзеля ўсталяваньня памятных знакаў і помніка героям барацьбы за незалежнасьць беларускай дзяржавы як у Слуцку, так і ў іншых месцах.
«Ініцыятары не зьбіраюцца адступаць і будуць весьці мэтанакіраваную барацьбу за гістарычную справядлівасьць у дачыненьні да загінулых патрыётаў Беларусі ў 1920 годзе, — гаворыць Аліна Нагорная. — Нават сорамна, што сёньня ў Слуцку няма ніводнага знаку, які нагадваў бы пра гэтую вельмі важную старонку гісторыі нашага краю».
