Лінкі ўнівэрсальнага доступу

Амбасадар Беларусі Петрышэнка: «Прыблізна кожная пятая дамова ў Расеі заключаецца з махлярскімі структурамі»


Ігар Петрышэнка

Беларускім прадпрыемствам працаваць на расейскім рынку становіцца ўсё больш складана, таму дзейнічаць ім трэба максымальна эфэктыўна.

Пра гэта заявіў амбасадар Беларусі ў Расеі Ігар Петрышэнка на сэмінары-нарадзе зь беларускімі экспартэрамі.

Паводле Петрышэнкі, працаваць на расейскім рынку становіцца ўсё больш складана.

«Дэвальвацыя расейскага рубля, дарагія крэдыты, адсутнасьць свабодных фінансавых сродкаў у спажыўца, зьніжэньне пакупніцкай здольнасьці — усё гэта непасрэдна ўплывае на абʼёмы нашых экспартных паставак. Растуць абʼёмы дзяржаўнай падтрымкі расейскіх вытворцаў аўтамабільнай і сельгастэхнікі, лёгкай прамысловасьці, што парушае цэнавую канкурэнтаздольнасьць беларускай прадукцыі».

Паводле Петрышэнкі, пратэрмінаваная дэбіторская запазычанасьць арганізацый Беларусі ў гандлі з Расеяй з пачатку году вырасла на 20,5%.

«Прыблізна кожная пятая дамова ў Расеі заключаецца з махлярскімі структурамі, якія не зьбіраюцца выконваць свае абавязаньні па аплаце пастаўленых тавараў. Досыць часта дамовы заключаюць кампаніі, якія знаходзяцца ў перадбанкрутным стане. У сувязі з гэтым беларускім экспартэрам, перш чым заключаць дамову і адгружаць тавар з адтэрміноўкай плацяжу, варта праводзіць прэвэнтыўную працу па праверцы новых контрагентаў, маніторынг фінансавага становішча на стадыі выкананьня кантракту, своечасовае прыняцьце мер па прымусовым спагнаньні запазычанасьці», — сказаў Петрышэнка.

Паводле Петрышэнкі, у разы павялічылася колькасьць зваротаў у амбасаду з боку прадпрыемстваў і арганізацый, якія просяць дапамагчы ў вяртаньні пратэрмінаваных даўгоў, перадае БелТА.

«Прычым у большасьці выпадкаў гэтыя даўгі безнадзейныя», — сказаў амбасадар.

Ваша меркаваньне

Паказаць камэнтары

XS
SM
MD
LG