Суд Сіэтлу прысудзіў да 27 гадоў турмы Рамана Селязьнёва, паведамляе The Seatlle Times. Грамадзянін Расеі, сын дэпутата Дзярждумы ад ЛДПР Валерыя Селязьнёва абвінавачваўся ў крадзяжы і продажы на чорным рынку двух мільёнаў нумароў крэдытных карт. Шкода ад яго дзейнасьці ацэньвалася ў 170 млн даляраў.
Паводле фэдэральнага пракурора, Раман Селязьнёў на працягу многіх гадоў быў «адным зь вядучых сусьветных пастаўшчыкоў дадзеных па крадзеных крэдытных картах». Пракурор параўнаў абвінавачанага з «босам мафіі ў стылі Тоні Сапрана».
«Ніколі яшчэ злачынец, які займаўся кампутарным махлярствам такога маштабу, ня быў знойдзены, злоўлены і прызнаны вінаватым амэрыканскім судом прысяжных», — падкрэсьліў бок абвінавачваньня.
Паводле сьледзтва, 32-гадовы расіянін узламаў тысячы кампутараў, у тым ліку ў рэстаранах штату Вашынгтон. Селязьнёва западозрылі ў датычнасьці да злачынстваў у 2010 годзе, пасьля таго, як Сакрэтная служба ЗША зьвязала ўзломы ў штатах Вашынгтон і Айдаха з адрасам электроннай пошты і вэб-сайтам, зарэгістраванымі ў Расеі. У 2011 годзе яму выставілі абвінавачваньні па 30 пунктах кампутарнага махлярства.
Селязьнёва затрымалі на Мальдывах у 2014 годзе. Пакуолькі ў краіны не было дамовы аб выдачы падазраваных у ЗША, амэрыканскія спэцслужбы правялі спэцаперацыю, якую Расея лічыць выкраданьнем. Паводле прадстаўнікоў абвінавачваньня, пры арышце ў Селязьнёва канфіскавалі ноўтбук, у якім захоўваліся 1,7 млн нумароў крэдытных карт.
Сам асуджаны назваў сябе палітвязьням і папрасіў дапамогі ў расейскага ўраду. З-за Селязьнёва Расея ўнесла ў сьпіс санкцый чацьвярых супрацоўнікаў Мінюсту ЗША.