У Сырыі загінулі яшчэ двое расейскіх кантрактнікаў — 41-гадовы Аляксей Сафонаў і 46-гадовы Уладзімер Плуцінскі. Пра гэта паведамляе агенцтва Reuters.
Сваяк Сафонава распавёў агенцтву, што той загінуў у Сырыі ў сярэдзіне сакавіка. Да гэтага Сафонаў ваяваў на ўсходзе Ўкраіны на баку прарасейскіх сэпаратыстаў. Плуцінскі быў забіты ў лютым падчас баёў за Пальміру. Таксама Reuters паведамляе пра гібель у Сырыі Міхаіла Няфёдава.
Паводле Reuters, з канца студзеня да канца сакавіка ў Сырыі загінуў 21 расейскі вайсковец. Гэта ў чатыры разы больш, чым паводле афіцыйных дадзеных Мінабароны Расеі, адзначае агенцтва.
У канцы сакавіка СМІ даведаліся пра дзевяць загінулых у Сырыі расейцаў.
З пачатку расейскай вайсковай апэрацыі ў Сырыі Міністэрства абароны пацьвердзіла гібель 28 расейцаў. СМІ неаднаразова паведамлялі, што сярод загінулых ёсьць байцы незарэгістраванай «прыватнай вайсковай кампаніі Вагнэра».