Усерасейскі пратэст дальнабойнікаў супраць сыстэмы «Платон» дабраўся да Масквы. На маскоўскай кальцавой аўтадарозе 17 красавіка паліцыя заблякавала калёну дальнабойнікаў ў раёне горада Рэутаў.
Фэдэральнае дарожнае агенцтва (Росавтодор) сьцьвярджае, што ў страйку дальнабойнікаў ўдзельнічае усяго дзьвесце машын па ўсёй краіне, у ведамстве заклікаюць не перабольшваць рэальныя наступствы акцыі для розьнічнага продажу і рынку грузаперавозак.
Тым ня менш, Таварыства абароны правоў спажыўцоў зьвярнулася да прэм’ер-міністра Дзьмітрыя Мядзьведзева; праваабаронцы паведамляюць аб ста шаснаццаці заявах грамадзян, якія паскардзіліся на памяншэньне асартымэнту ў крамах і росьце цэн з прычыны акцыі дальнабойнікаў. Адказу на гэты зварот пакуль не было.
«У Нямеччыне сыстэма аналягічная „Платону“ дзейнічае ўжо некалькі гадоў. Вынікам дзеяньня гэтай сыстэмы аказалася вымываньне ўсіх дробных і сярэдніх прадпрымальнікаў зь бізнэсу. Усе яны вымушаныя былі прадаць свае машыны, стаць звычайнымі кіроўцамі, і ў выніку паступіць на працу ў шэраг буйных манапалістаў. Гэта значыць, рынак быў, дзякуючы гэтай сыстэме, манапалізаваны. Ёсьць адчуваньне, што аналягічная сытуацыя рыхтуецца і ў Расеі», — лічыць кіроўца-дальнабойнік Аляксей Саракавы.
У дальнабойнікаў некалькі патрабаваньняў:
- адмена транспартнага падатку;
- прывядзеньне да расейскіх рэалій эўрапейскіх нормаў рэжыму працы і адпачынку кіроўцаў;
- удасканаленьне сыстэмы вагавага кантролю на дарогах.
Калі з усім пералічаным дальнабойнікі-прадпрымальнікі спрабавалі мірыцца, то сыстэма «Платон» з падвышанымі тарыфамі іх літаральна спустошыць.
«Калі мы гаворым пра тое, што раней мы плацілі паўтара рубля за кілямэтар, ад 15 красавіка хацелі зрабіць 3 рублі, але часова зрабілі 1,90, то сабекошт перавозкі — 35 рублёў. Гэта 10% было б ад сабекошту, але цяпер ня 10, цяпер 5–7%. Цалкам зьядае прыбытак, які плянуе атрымаць бізнэсмэн, прадпрымальнік-дальнабойнік», — кажа Саракавы.
Кіроўцы велікагрузаў кажуць, што калі перавозчыкам і ўладам ня ўдасца дамовіцца, то з паліцаў сталічных крамаў зьнікнуць шматлікія тавары, а цэны на тыя, што засталіся, прыкметна вырастуць.
