Лінкі ўнівэрсальнага доступу

Малдова падпісала мэмарандум аб супрацоўніцтва з Эўразійскім Эканамічным Саюзам (ЭўрАзЭС)


Прэзыдэнт Малдовы Ігар Дадон.

Дакумэнт падпісалі ў панядзелак у Кішынёве прэзыдэнт Малдовы Ігар Дадон і старшыня Калегіі Эўразійскай Эканамічнай камісіі (ЕЭК) Тыгран Саркісян. Падпісаньне адбылося падчас форуму ЭўрАзЭС, які праходзіць у Кішынёве.

Як паведамляе агенцтва «Інтэрфакс», у дакумэнце, праект якога быў абнародаваны напярэдадні прэс-службай прэзыдэнта Малдовы, прызнаецца імкненьне «закласьці аснову для ўсебаковага супрацоўніцтва бакоў, пачаць дыялёг з мэтай забесьпячэньня ўзаемавыгаднага эканамічнага супрацоўніцтва і садзеяньня пашырэньню і дывэрсыфікацыі гандлю паміж дзяржавамі — членамі Эўразійскага эканамічнага саюзу і Рэспублікі Малдова».

Асноўнымі напрамкамі будучага супрацоўніцтва названы рэгіянальная эканамічная інтэграцыя; гандлёвая палітыка; аналіз эканамічнага разьвіцьця і макраэканамічная сытуацыя ў дзяржавах; мытнае рэгуляваньне; тэхнічнае рэгуляваньне; прымяненьне санітарных, вэтэрынарна-санітарных і карантынных фітасанітарных мер; падатковае рэгуляваньне; фінансавыя рынкі і іншыя галіны.

Мэмарандум прадугледжвае стварэньне сумеснай працоўнай групы для ўзаемадзеяньня паміж Эўразійскай эканамічнай камісіяй і Малдовай. Кіраўніцтва групай будзе ажыцьцяўляцца двума сустаршынямі. На пасяджэньні працоўнай групы запрашаюцца прадстаўнікі органаў улады дзяржаў — члены Эўразійскага эканамічнага саюзу. Сустрэчы рабочай групы на узроўні сустаршыняў будуць праводзіцца не радзей за адзін раз на год.

У форуме ЭўрАзЭС, які праходзіць пад патранажам прэзыдэнта Малдовы, ня удзельнічаюць прадстаўнікі парлямэнту і ўраду. Кіруючая кааліцыя выступае супраць падпісаньня мэмарандуму з ЭўрАзЭС.

Выступаючы на прэсавай канфэрэнцыі ў Брусэлі ў мінулую пятніцу, прэм’ер-міністр Малдовы Павел Філіп заявіў, што мэмарандум ня будзе ратыфікаваны парлямэнтам і ня можа мець ніякіх юрыдычных наступстваў. Ён нагадаў, што згодна з законам аб міжнародных дамовах, без ратыфікацыі дакумэнты ня маюць юрыдычнай сілы.

Павел Філіп на прэсавай канфэрэнцыі ў Брусэлі. 31.3.2017.
Павел Філіп на прэсавай канфэрэнцыі ў Брусэлі. 31.3.2017.

«Мэмарандум ня будзе мець юрыдычных наступстваў. Урад ня будзе фінансаваць ніякія мерапрыемствы ў рамках гэтага дакумэнта, а парлямэнт не ратыфікуе яго. Такім чынам, прэзыдэнт не сумленны з партнэрамі, зь якімі хоча падпісаць мэмарандум, бо ня кажа ім пра гэта. Гэта іх праблема — калі яны згодныя падпісаць дакумэнт, які ня будзе мець ніякага юрыдычнага эфэкту», — заявіў Павел Філіп.

Ваша меркаваньне

Паказаць камэнтары

XS
SM
MD
LG