Натальлю Папкову будуць судзіць 24 сакавіка за «Марш недармаедаў» у Берасьці
Адну зь лідэраў берасьцейскіх пратэстаў Натальлю Папкову затрымалі 22 сакавіка на вакзале ў Берасьці, калі яна мелася зьяжджаць у Менск для ўдзелу ў акцыі 25 сакавіка. Натальлю зьвінавацілі ва ўдзеле ў несанкцыянаванай масавай акцыі — «Маршы недармаедаў», які адбыўся 5 сакавіка ў Берасьці.
Судовае паседжаньне пачалося ўчора ўвечары, аднак яго давялося перанесьці, бо актывістка заявіла хадайніцтва, што ёй трэба час, каб заключыць дамову з адвакатам.
У Воршы актывістаў выклікаюць позвамі на 25 сакавіка ў рэгіянальнае аддзяленьне Сьледчага камітэту.
Позвы атрымалі рэдактар рэгіянальнага сайту orsha.eu Ігар Казьмерчак і сябра Аб’яднанай грамадзянскай партыі Станіслаў Храпавіцкі, паведамляе правабарончы цэнтар «Вясна».
У Слоніме суд над Віктарам Марчыкам за «сход недармаедаў»
Віктара Марчыка людзі ў цывільным схапілі адразу пасьля «Народнага сходу», які адбыўся ў мінулую нядзелю на прыступках Слонімскага райвыканкаму. Ён быў адзіным затрыманым. Судовы працэс пачаўся яшчэ ў мінулы панядзелак.
Віктар Марчык хадайнічаў аб тым, каб яму далі магчымасьць скарыстацца паслугамі адваката. Суд быў перанесены на 24 сакавіка. Марчык паведаміў Свабодзе, што адваката за гэтыя дні так і не знайшоў.
Сёньня адбудзецца прэс-канфэрэнцыя са сваякамі затрыманых
Праваабарончы цэнтар «Вясна» правядзе прэсавую канфэрэнцыю з роднымі і блізкімі тых, каго затрымалі спэцслужбы ў апошнія дні з прад’яўленьнем абвінавачаньня ў падрыхтоўцы «масавых беспарадкаў».
Прэс-канфэрэнцыя адбудзецца 24 сакавіка а 13.00 у офісе ПЦ «Вясна» па адрасе: г. Менск, вул. Мяржынскага, 8-26.
Міліцыя вартуе Лагвінца ў лякарні, сыну не даюць зь ім паразмаўляць
Палітыка Алеся Лагвінца, зьбітага пры затрыманьні 23 сакавіка, пасьля спробы суду адвезьлі ў лякарню: у яго пералом носу, закрытая чэрапна-мазгавая траўма і страсеньне мозгу.
Ягоны сын Антось Лагвінец распавядае Свабоде: «Тэлефанаваў ягоны сусед па палаце, паведаміў, што ўсё добра, уначы нікуды не вывозілі. Але міліцыянты ў форме, якіх прызначылі ахоўваць, усю ноч стаялі, былі зь імі. Зараз будзем накіроўвацца да шпіталя, ставіць варту, каб ведаць, калі яго на суд павязуць ці на далейшае абсьледаваньне, бо наўпроставага кантакту зь ім ня маю, ягоны тэлефон апісалі.
Што з суду вядома, што яго вінавацяць у дробным хуліганстве, 17.1 КоАП. Пратаколу тата не падпісваў, бо быў нязгодны зь ім. Дэталі пратаколу яму не зачытвалі».
Новыя суды ў Гомелі — судзяць інваліда за інфармацыю ў «Фэйсбуку»
У Цэнтральным судзе ў 9.15 пачнецца разгляд адміністрацыйнага пратаколу у дачыненьні да інваліда Андрэя Макарава, складзенага начальнікам аддзелу аховы грамадзкага парадку Цэнтральнага РАУС падпалкоўнікам міліцыі Ўладзіславам Шукелем паводле артыкулу 23.34 КаАП. Інваліда вінавацяць у закліках на несанкцыянаваную акцыю пратэсту, распаўюджаных праз «Фэйсбук».
Андрэя Макарава ўжо аштрафавалі на 25 базавых велічыняў за ўдзел у «Маршы недармаедаў», які адбыўся ў Гомелі 19 лютага.
«У бюджэце грошыкі скончыліся, — сказаў адразу пасьля прысуду інвалід Макараў. — Пару чалавек пасадзілі на суткі, каб прыдаць страху, а з нас маюць грошы цыганіць. Саджаць будуць 25-26 сакавіка».
У судзе Чыгуначнага раёну а 10-й гадзіне пачынаюцца суд над Мікалаем Пяшко і моладзевым актывістам, блогерам Арцёмам Шарапавым. Іх таксама міліцыя абвінаваціла ў распаўсюдзе ў «Фэйсбуку» заклікаў да ўдзелу ў акцыі пратэсту на Дзень Волі.
У гэты ж час у Савецкім судзе Гомелю маюць судзіць за такія ж «правіннасьці» грамадзкіх актывістаў Андрэя Толчына і Юрася Захаранку. Апошні зь іх — інвалід, капітан запасу, ачольвае мясцовую арганізацыю Беларускай сацыял-дэмакратычнай партыі (Грамады). На прэзыдэнцкім выбарах 2010 году быў рэгіянальным кіраўніком выбарчага штабу кандыдата ў прэзыдэнты Мікалая Статкевіча. Неаднаразова караўся штрафамі і арыштамі.
Судзяць Мікалая Казлова
Затрыманы ўчора намесьнік старшыні АГП Мікалай Казлоў цяпер у судзе. Прадстаўнікі АГП пакуль ня ведаюць, за што менавіта судзяць Казлова, але дапускаюць, што суд зьвязаны з «Маршам абураных беларусаў», што прайшоў яшчэ 17 лютага.
У Гомелі інваліда Макарава засудзілі да 7 сутак
Інваліда Андрэя Макарава прызналі вінаватым у закліках на несанкцыянаваную акцыю пратэсту, распаўсюджаных праз «Фэйсбук».
У Цэнтральным судзе Гомеля адбыўся разгляд адміністрацыйнага пратаколу у дачыненьні да інваліда Андрэя Макарава, складзенага начальнікам аддзелу аховы грамадзкага парадку Цэнтральнага РАУС падпалкоўнікам міліцыі Ўладзіславам Шукелем паводле артыкулу 23.34 КаАП.
Раней Андрэя Макарава ўжо аштрафавалі на 25 базавых велічыняў за ўдзел у «Маршы недармаедаў», які адбыўся ў Гомелі 19 лютага.
Андрэй Макараў стаў інвалідам, калі служыў у паветрана-дэсантных войсках. Іх падразьдзяленьне кінулі на разгон дэманстрантаў у Азэрбайджане ў 1990 годзе. Там ён атрымаў удар жалезным прутом у правае брыво і вока. Пасьля дэмабілізацыі працаваў на прадпрыемстве таварыства сьляпых «Віпра», але яно збанкрутавала. Жыве Макараў зь сям’ёю на ягоную сьціплую пэнсію па інваліднасьці.
«Патрэбны эканамічныя рэформы і свабодныя выбары. Інакш Беларусь ня выжыве», — лічыць інвалід Макараў.
За пост «УКантакце» — 15 базавых
Аднаго з абвінавачаных за пасты ў сацсетках, жыхара Гомля Дзьмітрыя Сянкевіча суд аштрафаваў на 15 базавых велічыняў (345 рублёў) за «заклік выйсьці на плошчу і зрабіць рэпост». У посьце зь ягоным подпісам у ВК-суполцы «Stop Luka» быў заклік выходзіць на гомельскі «Дзень волі» ў «масках ананімуса» — сама акцыя на Дзень Волі ў Гомелі не санкцыянаваная ўладамі (як і апошнія 12 год), а нашэньне масак на мітынгах незаконнае.
Затрымалі кіраўніка клюбу «Патрыёт» Міколу Міхалькова. Зранку адпусьцілі
Сяргей Чыслаў (Бульба) паведаміў на сваёй старонцы ў «Фэйсбуку», што 23 сакавіка а 19.07 быў затрыманы былы спэцназавец Мікола Міхалькоў — кіраўнік афіцыйна зарэгістраванага вайскова-спартовага клюбу «Патрыёт».
У гэты дзень ён быў запрошаны на размову ў КДБ Бабруйску, але пасьля ня выйшаў на сувязь. А 10-ай раніцы стала вядома, што Мікіту Міхалькова адпусьцілі.
Судзяць Яўгена Міхасюка
Абноўлена: 5 сутак арышту
Сябра «Зялёнай сеткі» Яўгена Міхасюка судзяць у Доме правасудзьдзя ў Менску, паведамляюць яго сябры ў сацсетках. Яго затрымалі 23 сакавіка — нібыта «лаяўся матам і не падпарадкоўваўся людзям у спартовай форме» (на судзе сьведкі-міліцыянты не адмаўляюць, што былі бяз формы), абвінавачваюць у дробным хуліганстве і непадпарадкаваньні супрацоўнікам міліцыі.
У Гомелі затрыманы праваабаронца (рэгіянальны прадстаўнік БХК) Алесь Яўсеенка. Ён пасьпеў паведаміць, што знаходзіцца ў судзе Савецкага раёну Гомеля.
У Савецкім судзе Гомеля пакаралі арыштамі на 8 сутак Андрэя Толчына і Юрася Захаранку.
У Гомелі аштрафавалі моладзевага актывіста Зьмітра Сямковіча на 15 базавых велічыняў за рэпост інфармацыі пра акцыю пратэсту на Дзень Волі ў Гомелі.
Кіраўнік клюбу «Патрыёт» на волі: «Патрыёты сваёй краіны не зьбіраліся распальваць у сябе дома пажар»
«Усе хлопцы, якія былі ў мяне ў клюбе, ня маюць ні да экстрэмізму, ні да тэрарызму, ні да падрыхтоўкі баевікоў, — кажа Свабодзе Міхалькоў. — Абсалютна нармальныя, адэкватныя хлопцы, афіцэры! Яны сапраўдныя патрыёты сваёй краіны — відавочна не зьбіраліся распальваць у сябе дома пажар».
Арцём Кавалёў — 10 сутак
Паводле зьвестак праваабаронцы Леаніда Судаленкі, актывіст Арцём Кавалёў з Чачэрску асуджаны на 10 сутак адміністрацыйнага арышту за ўдзел у «Маршы недармаедаў» у Гомелі.
У Мёрах міліцыянты зьбілі актывіста БХД
Як паведамілі ў прэс-службе Беларускай хрысьціянскай дэмакратыі, 23 сакавіка ў Мёрах затрымалі актывіста арганізацыі Валера Валажонка. Ён расказаў, што ўдзень да яго гвалтоўна ўварваліся міліцыянты, моцна ўдарылі па галаве і адвезьлі ў пастарунак, дзе пратрымалі да позьняга вечара.
На сёньня Валажонка зноў выклікалі ў міліцыю, але ён паведаміў, што замест гэтага пойдзе спачатку да пракурора і адваката, а потым да хірурга, каб даведацца, наколькі моцная ў яго траўма, бо дагэтуль «вельмі баліць і кружыцца галава».
Таксама позву ў міліцыю атрымаў каардынатар БХД у Мёрах Багуслаў Мацук.
Павал Юхневіч — 7 сутак арышту
24 сакавіка грамадзкі актывіст Павал Юхневіч асуджаны на 7 сутак адміністрацыйнага арышту. Яго затрымалі 23 сакавіка, да суду трымалі ў ЦІП на вуліцы Акрэсьціна.
Пра прысуд паведаміла жонка Юхневіча Рамуальда. У Паўла і Рамуальны Юхневічаў двое маленькіх дзяцей.
Мікалай Казлоў — 4 сутак за «мат у грамадзкім месцы»
Намесьнік старшыні АГП Мікалай Казлоў атрымаў ад судзьдзі Міхаіла Хомы прысуд: 4 сутак адміністрацыйнага арышту за тое, што нібыта «лаяўся матам».
Як перадае сайт АГП, на судзе выступаў сьведкам супрацоўнік АМАП, які «чуў зь іншага боку вуліцы, як Мікалай лаяўся ў адрас улады матам, пагражаў міліцыянтам, лаяўся на іх адрас», а таксама што Казлоў не падпарадкоўваўся патрабаваньням міліцыі. Паўтарыць, што ён казаў, сьведкі-міліцыянты ня здолелі.
Казлоў сьцьвярджае, што міліцыя фільмавала затрыманьне, міліцыянты гэта адмаўляюць.
Далей Казлова могуць адвезьці на іншы працэс — раней яму прыйшла павестка на 24 сакавіка ў суд за, магчыма, удзел у «Маршы абураных беларусаў» 17 лютага або за адзін са збораў подпісаў. Пэўнасьці ў тым, ці будзе другі суд і ў чым яшчэ абвінавачваюць Казлова, няма.
«Маладафронтаўцы» не ў КДБ, а на «Валадарцы»
Наста Дашкевіч, жонка лідэра «Маладога фронту» Зьмітра Дашкевіча, паведамляе, што яе муж не ў СІЗА КДБ. Ён, а таксама «маладафронтавец» Сяргей Пальчэўскі, у СІЗА на Валадарскага, паведамілі ёй у КДБ, калі яна спрабавала занесьці перадачу затрыманым.
Яна мяркуе, што там жа маюць знаходзіцца іншыя затрыманыя сябры «Маладога фронту». Але яна ня бачыць нейкай лёгікі ў такім падзяленьні (напрыклад, што іх працэсы асобныя ад працэсаў над «Белым легіёнам»). Ніякіх іншых зьвестак пра затрыманых не паведамляюць ні ёй, ні адвакату.
Кот, які зьнікнуў з кватэры Дашкевічаў у час ператрусу, пакуль не знайшоўся.
