Лінкі ўнівэрсальнага доступу

Старшыня Слонімскага райвыканкаму гадзіну размаўляў з 300 «недармаедамі» на вулічнай акцыі. Удзельнікі: «Мы яму ня верым»


"Марш недармаедаў" у Слоніме 19 сакавіка 2017 году

Больш за гадзіну цягнулася гутарка ўдзельнікаў акцыі са старшынём Слонімскага райвыканкаму Алегам Таргонскім. Чыноўніку задавалі шмат прыватных пытаньняў, зьвязаных са звальненьнямі канкрэтных асобаў і немагчымасьцю ўладкавацца на працу. Таксама людзей вельмі абурае стан дарог у горадзе і недахоп мэдыцынскіх устаноў.

Падрабязьней пра акцыю тут

Арганізатар затрыманы, хоць старшыня райвыканкаму і абяцаў заступіцца

У размове з пратэстоўцамі старшыня слонімскага райвыканкаму паабяцаў заступіцца за кожнага ў выпадку рэпрэсій за ўдзел у акцыі «Марш недармаедаў».

Пасьля мітынгу быў затрыманы адзін з арганізатараў «Маршу недармаедаў» у Слоніме Віктар Марчык.

Запіс відэатрансьляцыі з акцыі ў Слоніме:

Старшыня райвыканкаму выслухаў пытаньні, але адказаць на іх ня змог

Людзі размаўлялі з Алегам Таргонскім зь недаверам і нават са злосьцю, але ён у адрозьненьне ад сваіх калегаў з Воршы, Горадні, Берасьця і іншых гарадоў, дзе адбываліся «Маршы недармаедаў», застаўся з пратэстоўцамі на вуліцы і выслухаў большасьць пытаньняў.

"У Слоніме не заробіш больш за 200 рублёў"
"У Слоніме не заробіш больш за 200 рублёў"

Адказваючы на іх, чыноўнік запрашаў удзельнікаў мітынгу на асабістыя прыёмы, падкрэсьліваючы, што «так зможа дэталёвы вывучыць праблему кожнага». Ён прызнаў, што ў Слоніме ёсьць праблемы зь дзіцячай паліклінікай і дарогамі: «Гэтыя праблемы ёсьць і вырашаць іх вельмі складана», — сказаў Таргонскі.

Ён падкрэсьліў, што дзеяньне дэкрэту № 3 прыпыненае, улады спрабуюць вырашыць праблему беспрацоўя.

«Няма даверу да чыноўнікаў, ня верым Таргонскаму, усё вырашаецца наверсе. Усё вырашае Лукашэнка», — казалі людзі на мітынгу.

«Хто ў Слоніме працуе, ня можа зарабіць больш за 200 рублёў»

Удзельнікі акцыі выказалі абурэньне тым, што за апошнія гады ў горадзе закрыўся шэраг прадпрыемстваў: аўтарамонтны завод, «Тэкстыльнік», «Пух-пяро», «Сельгастэхніка», іншыя прадпрыемствы істотна скарачаюць супрацоўнікаў. Тыя, хто пакуль працуе, ня можа зарабіць больш за 200 рублёў, таму мужчыны вымушаныя кідаць сем’і і ехаць на заробкі ў Расею.

Высунута патрабаваньне новай эканамічнай палітыкі і свабодных выбараў

Вынікам мітынту стала галасаваньне за рэзалюцыю, у якой высунуты шэраг эканамічных і палітычных патрабаваньняў.

Пратэстоўцы размаўляюць з Алегам Таргонскім
Пратэстоўцы размаўляюць з Алегам Таргонскім

Так, сланімчане запатрабавалі прыняць новы эканамічны курс у Беларусі: адмяніць дэкрэт № 3, стварыць новыя працоўныя месцы, спыніць рост цэнаў і камунальных плацяжоў, вярнуць у Беларусі вяршэнства Канстытуцыі, а не антызаконных дэкрэтаў. Палітычнае патрабаваньне — правесьці свабодныя выбары.

Таксама ўдзельнікі акцыі запатрабавалі адмяніць прымусовыя кантракты, даць годныя заробкі працоўным, стварыць умовы для разьвіцьця прыватнага прадпрымальніцтва, спыніць павышэньне пэнсійнага ўзросту. Асобна ў рэзалюцыі адзначана, што ўдзельнікі мітынгу патрабуюць ад дзяржаўных СМІ праўдзівай інфармацыя пра эканамічную і сацыяльную сытуацыю ў Беларусі, а таксама вярнуць «Газэту Слонімскую» у сыстэму распаўсюду «Белсаюздрук» і «Белпошта».

За рэзалюцыю прагаласавалі адзінагалосна.

Ваша меркаваньне

Паказаць камэнтары

XS
SM
MD
LG