Лінкі ўнівэрсальнага доступу

Марзалюк аб пратэсьце ў Магілёве: Сярод удзельнікаў былі турысты і «гастралёры»


Ігар Марзалюк на "Маршы недармаедаў" у Магілёве, 15 сакавіка
Ігар Марзалюк на "Маршы недармаедаў" у Магілёве, 15 сакавіка

Падчас «Маршу недармаедаў» у Магілёве ў сераду да ўдзельнікаў акцыі пратэсту выйшаў дэпутат Палаты прадстаўнікоў Ігар Марзалюк.

Ён прапанаваў прысутным зьвяртацца да яго з пытаньнямі і праблемамі і заклікаў пратэстоўцаў ня весьціся на правакацыі, каб не дапусьціць «страты тэрытарыяльнай цэласнасьці».

Сёньня ў інтэрвію Свабодзе дэпутат Палаты прадстаўнікоў з Магілёва распавёў, што пагражае беларускай незалежнасьці.

Гурневіч: Ігар Аляксандравіч, патлумачце, калі ласка, як зьвязаныя пратэсты незадаволеных эканамічнай сытуацыя ў краіне людзей з пагрозамі страты тэрытарыяльнай цэласнасьці?

Марзалюк: А вы добра падумайце і паглядзіце, за чые грошы некаторыя картавыя, хранічныя пэрсанажы ўчыняюць гэтыя экшаны. А ўсё астатняе я казаць ня буду, магчыма, гэта няпраўда. Але ёсьць такія дрэнныя зьвесткі.

Гурневіч: А куды, у якую краіну вядзе гэты сьлед?

Марзалюк: Я не хачу нічога гаварыць, бо за кожнае слова я пазьней буду вымушаны несьці пэрсанальную адказнасьць Але няхай 10 разоў падумаюць пра тых людзей, якія распалілі ўжо на суседніх межах вельмі непрыстойныя рэчы, і людзей, якія адштурхоўваюць нас ад Эўропы сваімі дзеяньнямі. Я не кажу пра простых абяздоленых людзей, а пра заўчарашніх пэнсіянэраў, сьпісаных ва ўтыль. Яны ўжо хадзілі і кланяліся на Старую плошчу [У Маскве на Старой плошчы месьціцца адміністрацыя прэзыдэнта Расеі — РС] і ў Кіеў. Яны пачуюць і зразумеюць. І вы выдатна разумееце, пра каго я кажу

Гурневіч: А якое вы бачыце выйсьце з гэтай сытуацыі, калі ёсьць сацыяльны выбух і пагроза незалежнасьці, і яны, паводле вас, узаемазьвязаныя?

Марзалюк: Няма ніякага сацыяльнага выбуху. Са 100 ці нават з 300 чалавек толькі 40 засталося са мной гаварыць. А праблемы з працай былі толькі ў сямі, і большая частка зь іх не магілёўцы. Гэта турысты і «гастралёры». Разумееце? Таму выбуху няма.

Гурневіч: Але ёсьць факт: незадаволеных людзей шмат. Што вы ім прапануеце і як працуеце зь імі?

Марзалюк: А вось так і працуем. Я выйшаў і працаваў. І дэкрэт мы зьмяняем, і ўсё астатняе робім. Не хвалюйцеся. Мы не дапусьцім ні да страты тэрытарыяльнай цэласнасьці, ні да крыві, ні да грамадзянскай вайны. Не на тых трапілі. Беларусь не Ўкраіна.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG