Лінкі ўнівэрсальнага доступу

У Пінску на акцыі пратэсту не было відавочнага лідэрства. Не было сцэны для выступу прафэсійных грамадзкіх актывістаў з мэгафонамі ў руках. У натоўпе быў хлопец з БЧБ на плячах і мужчына з дзяржаўным сьцягам у руках. Больш ніякай сымболікі.

Амаль усе, хто выказваліся, казалі «ён», спасылаліся ці апэлявалі да «яго».

Некалькі сот чалавек самага рознага ўзросту — і працаздольнага веку, і пэнсіянэры. Ніжэй падборка галасоў удзельнікаў «дармаедзкага» мітынгу (асабліва моцныя эпітэты прыбраныя).

— Я бяз працы, хадзіў на біржу, дык там трэба падачку (хабар — РС) даць, каб цябе паставілі на ўлік.

— Буду супраць «Бацькі». Ён мог бы сысьці з паднятай галавой, але не.

— Прыйшоў не дзеля сябе, а дзеля сваіх дзяцей. Хачу, каб ім жылося лепей. У цэлым у горадзе настрой як тут на плошчы. Настрой у курылках выказваецца. Баяцца людзі.

— Муж не пайшоў на плошчу, бо баіцца згубіць працу.

— Ну дык што — замарозіў дэкрэт? А налета адмарозіць.

— Ён кагосьці вінаватым знайшоў, але не сябе (у справе эканамічнага абвалу — РС).

— Пэнсія 200 р. — 50 р. за кватэру, а жыць за што?

— Лета прыйдзе, вы ня ўбачыце аніводнага маладога чалавека. Хто ў Польшчу, хто ў Расею, хто куды паедзе.

— Па-пацанску скажу, так справы не робяцца. Зьмяняць уладу трэба.

— Хадзіў у цэнтар занятасьці. Прапаноўвалі 300. Як удваіх пражыць на такія грошы? Я хачу працаваць, але не за 300 р., — кажа малады мужчына.

— У стаж служба ў войску не ідзе, вучоба, а дэкрэт у жанчын? А казаў жа — нараджайце!

— Пара за вілы брацца, — упэўнена кажа дзядуля.

— Сын у Расеі пакутуе, а дачка маладзец — у Нямеччыне жыве замужам.

— За што нашы дзяды ваявалі!? — пытаецца маці зь немаўлём у вазочку.

— Я служыў у СССР на Камчатцы. Мне там стаж год за два йшоў. Тут пайшоў не пэнсію, мне кажуць, што ня ўлічаць год за два: «Не паложана — іншая дзяржава». А чаго вы тады кожны дзень пра «саюзную дзяржаву» гаворыце?

— Абяцаў з карупцыяй разабрацца. А сам панаставіў лядовых палацаў і міліцыю напладзіў.

— 100 даляраў дзіцёнку за амуніцыю на лядовы палац, каб займалася, які рабочы і калхозьнік купіць? Навошта будаваў тыя палацы?

— Пераапранутыя стаяць (міліцыя — РС), пасьля выклікаць будуць. А то і ў псіхушку забяруць.

Боязь «псіхушкі» як меры пакараньня гучыць на мітынгу не адзін раз.

— Дачцэ 55 гадоў, хто яе на работу возьме?!

— Я ня знаю, што сказаць Лукашэнку. Прыслухацца да людзей. Бо працы няма. У савецкі час і то лепей жылося.

— Гэта страшнае дзела, што робіцца ў Беларусі. Да крайнасьці дайшлі. Пры Брэжневу жылі ў сто разоў лепш.

Многія на мітынгу ўзгадваюць савецкія часы як лепшыя. Той самы тэзіс, які Лукашэнка меў доўгі час як козыр. Маўляў, вярну як было — стабільна і надзейна.

— Хай глядзіць за ўсімі гарадамі, а ня толькі за Менскам. Людзі зь Пінску едуць у Менск зарабіць. Усім гарадам трэба надаваць увагу.

— Справядлівыя выбары, замена ўлады!

— Яго Ярмошына выбірае.

— Выжываем на курыных сьпінках.

— На работу не бяруць, вучыцца не бяруць. Толькі па тэлевізары мы добра жывем.

Бабуля (плача): — Мяне аштрафавалі за тое, што пасьля пэнсіі працавала.

Ваша меркаваньне

Паказаць камэнтары

XS
SM
MD
LG