Актывіст абвінавацілі паводле пяці артыкулаў адміністрацыйнага кодэксу аб дробным хуліганстве, парушэньні правілаў правядзеньня масавых мерапрыемстваў, а таксама непадпарадкаваньні супрацоўнікам міліцыі. А менавіта — за ўсталяваньне намёту на месцы будаўніцтва каля ўрочышча Курапаты, за перашкоды ў будаўніцтве праз знаходжаньне на даху трактара, за правядзеньне гарадзкога мітынгу ў Курапатах, а таксама за, нібыта, непадпарадкаваньні супрацоўнікам міліцыі падчас затрыманьня.
Судзьдзя адмовіў Зьмітру Дашкевічу весьці працэс па-беларуску, забараніў відэаздымкі, а таксама адмовіў у хадайніцтве праглядзець відэазапіс затрыманьня актывіста.
У судзе сьведчылі міліцыянты, якія затрымлівалі Зьмітра і якія дзяжурылі ў Курапатах. Зьміцер Дашкевіч назваў іх сьведчаньні хлусьнёй і папярэдзіў пра адказнасьць за антыхрысьціянскія ўчынкі.
Падтрымаць Зьмітра Дашкевіча ў судзе прышлі некалькі дзесяткаў чалавек, у тым ліку жонка Наста і паплечнік Зьмітра Сяргей Пальчэўскі, які падчас працэсу над Зьмітром быў вызвалены пасьля трох сутак арышту і адразу прыехаў у суд падтрымаць сябра.
Рашэньне аб адміністрацыйным зьняволеньні цягам трох сутак суд вынес пасьля двухгадзіннага перапынку, а 20.00 вечара.
Рашэньне аб зьняволеньні Зьміцер Дашкевіч назваў гібрыднай вайной улады супраць грамадзянскай супольнасьці Беларусі.
Вынясеньне прысуду
Невядомыя схапілі Зьмітра Дашкевіча ў жывым эфіры
Затрыманьне адбылося непадалёк ад Сядзібы БНФ, дзе пачаўся збор подпісаў пад адкрытым лістом да Міністэрства культуры з патрабаваньнем прыняць новы праект зонаў аховы мэмарыялу «Курапаты». У час падпісаньня Дашкевіч, ініцыятар абароны Купапатаў, казаў:
«Мажліва Шорац (старшыня Менгарвыканкаму – РС.) будзе шукаць іншых забудоўшчыкаў, у кожным выпадку, нам усім разам – сотням чалавек – нам атрымалася вывесьці тэму на агульнанацыянальны ўзровень абмеркаваньня».
Пасьля падпісаньня Дашкевіч выйшаў з пад’езду Сядзібы, накіроўваўся да аўтамабілю.
Невядомыя, якія схапілі Дашкевіча. Кадр з жывой трансьляцыі:
Празь некалькі хвілінаў пасьля затрыманьня старшыня Руху «За свабоду» Юры Габарэвіч выставіў у сваім профілі на Facebook відэа затрыманьня. Ён дадае, што пад Сядзібай БНФ застаецца стаяць сіні мікрааўтобус, вядомы па ранейшых затрыманьнях дэмакратычных актывістаў.
