Лінкі ўнівэрсальнага доступу

У Берасьці анархістаў затрымліваюць, судзяць і не адпускаюць па завяршэньні тэрміну арышту


Сваякі ды сябры анархістаў чакаюць каля ізалятару

Берасьцейскія анархісты Андрэй Дзенюшкін і Руслан Халікаў сёньня павінны былі выйсьці на свабоду пасьля арышту, але гэтага не адбылося. Мяркуецца, што іх ізноў будуць судзіць.

Сваякі, сябры і праваабаронцы з 15.50 чакалі вызваленьня Андрэя Дзенюшкіна з ізалятару часовага ўтрыманьня. У гэты час скончыўся тэрмін адбыцьця прысуджаных яму 5 сутак за ўдзел у «Маршы недармаедаў», які адбыўся 5 сакавіка ў Берасьці.

Аднак, Дзенюшкін з ізалятару так і ня выйшаў. Ягонай маці паведамілі, што ён ізноў затрыманы. Берасьцейскі праваабаронца Ўладзімер Вялічкін мяркуе, што хлопца будуць судзіць ізноў у панядзелак, 13 сакавіка.

Ня выйшаў а 20.25 і Руслан Халікаў, асуджаны таксама за ўдзел у «Маршы недармаедаў». Сёньня а 22.15 завяршаецца тэрмін адбыцьця 5-суткавага пакараньня і Дзьмітрыя Ляўчука. Праваабаронцы ня выключаюць, што ня выйдзе і ён.

Толькі адзін з чатырох асуджаных анархістаў — Аляксандар Казьлянка — выйшаў з ізалятару напярэдадні, адбыўшы прысуджаныя яму 4 сутак арышту.

Сёньня ў Берасьці да 5 сутак арышту быў асуджаны Андрэй Марач, які напярэдадні прынёс перадачу сваім сябрам. Выйшаўшы з ізалятару, Андрэй быў затрыманы і ноч да суду правёў у пастарунку.

А 18 гадзіне праваабаронцам паведамілі паплечнікі анархістаў, што сёньня быў затрыманы яшчэ адзін актывіст — Канстанцін Копаць. Паводле праваабаронцаў, верагодна, яго таксама будуць судзіць 13 сакавіка.

На ўваходзе на тэрыторыю РАУС узмоцнены кардон
На ўваходзе на тэрыторыю РАУС узмоцнены кардон

Ваша меркаваньне

Паказаць камэнтары

XS
SM
MD
LG