Каштоўныя артэфакты народнай культуры ўкраінцаў і беларусаў прадставіла на выставе Галіна Безбародка, майстар народнай творчасьці, сябра грамадзкай арганізацыі «Беларускі саюз майстроў народнай творчасьці». Шмат якім рэчам зь яе калекцыі больш за сто гадоў. А самаму старому строю — каля двухсот.
«Для Ўкраіны вышыванка і ручнікі маюць асаблівае значэньне. Вышыванка мае сакральны сэнс, гэта магія народу. Нашы воіны, што ваююць на Ўсходзе Ўкраіны з акупантамі, пад уніформу надзяюць вышыванку, бо яна мацнейшая за бронекамізэльку. Калі ў нашай амбасадзе дэманстравалася калекцыя Галіны Безбародкі, усе супрацоўнікі амбасады адчувалі магію сакральнага, аўру вышыванак», — сказаў Валеры Джыгун, часовы павераны ў справах Украіны ў Рэспубліцы Беларусь.
Галіна Безбародка пачала зьбіраць аўтэнтычныя рэчы яшчэ ў 13 гадоў. Яе натхніла прыгажосьць Прыкарпацьця, якую пабачыла на свае вочы, прыехаўшы да цёткі ў Івана-Франкоўск.
Украінскія ручнікі, лялькі, народныя строі, кераміку ды кнігі Галіна Безбародка зьбірае ўсё жыцьцё. Нешта дораць прадстаўнікі ўкраінскай дыяспары ў Беларусі, нешта спадарыня Галіна набывае сама. Экспанатаў хапіла на прыватны музэй «Украінская мазанка», які месьціцца пад Менскам.
Майстрыха і захавальніца культурнай спадчыны, Галіна Безбародка шчыра палюбіла Беларусь, краіна для яе нібыта другая радзіма. Пераехаўшы з мужам у 70-х у Менск, жанчына стала кіраўніцай творчай студыі «Бусьляня» пры Нацыянальным цэнтры мастацкай творчасьці дзяцей і моладзі. Езьдзіла ў вандроўкі па Беларусі, зьбіраючы экспанаты для свайго музэю. Таму на выставе «Родныя крыніцы. Рідні джерела» можна пабачыць і беларускія саматканыя ручнікі ды жаночыя строі.
«Галіна Безбародка ўступіла ў Саюз майстроў яшчэ ў 90-я гады і з тых часоў дэманструе і сваю творчасьць, і творчасьць сваіх суайчыньнікаў, пераважна продкаў. Ручнікі, якія бачым на выставе, адметныя ромба-геамэтрычнай, славянскай сымболікай чырвонага колеру. Праўда, ва ўкраінцаў, у адрозьненьне ад беларусаў, больш расьліннай арнамэнтыкі. Унікальныя краявецкія ручнікі, якія зрабілі ўплыў і на нашу культуру. Тут можна пабачыць славутую косаўскую кераміку Прыкарпацьця. Адметна, што выстава адбываецца ў музэі Янкі Купалы. Наш пясьняр і ўкраінскі Шаўчэнка многае зрабілі для сваіх народаў», — сказаў старшыня саюзу майстроў Яўген Сахута.
На адкрыцьці выставы прагучалі песьні на ўкраінскай мове ў выкананьні Кірылы Старасьценкі, саліста Белдзяржфілярмоніі.
