Іншы прадстаўнік Расеі Ільля Рагачоў патлумачыў наяўнасьць узбраеньняў у сэпаратыстаў тым, што яны захапілі яго зь месцаў захоўваньня зброі былой савецкай арміі, якія знаходзіліся ў шахтах. Доказы ўкраінскага боку аб выкарыстаньні сэпаратыстамі ў Данбасе найноўшай зброі, якая маецца на ўзбраеньні толькі ў расейскай арміі, прадстаўнік Расеі не пракамэнтаваў.
Рагачоў таксама адхіліў абвінавачваньні ў фінансаваньні тэрарызму на ўсходзе Ўкраіны. Прадстаўнік міністэрства замежных спраў Расеі Грыгорый Лукʼянец заявіў, што менавіта Ўкраіна, а не Расея дзесяцігодзьдзямі ўціскала і падвяргала дыскрымінацыі крымскіх татараў.
Міжнародны суд ААН у Гаазе 6 сакавіка пачаў разгляд пазову Ўкраіны супраць Расеі «аб фінансаваньні тэрарызму і расавай дыскрымінацыі». Кіеў патрабуе прыцягнуць Расею да адказнасьці за парушэньне дзьвюх канвэнцый — аб барацьбе з фінансаваньнем тэрарызму і аб ліквідацыі расавай дыскрымінацыі.
Украіна падала пазоў супраць Расеі ў Міжнародны суд ААН у Гаазе 16 студзеня. Пасяджэньні праходзяць з 6 па 9 сакавіка.
