Лінкі ўнівэрсальнага доступу

Ярмошына: Лёс выбарчага заканадаўства Беларусі вырашыцца 20 сакавіка


Лідзія Ярмошына
Лідзія Ярмошына

Старшыня Цэнтральнай выбарчай камісіі Беларусі Лідзія Ярмошына паведаміла Свабодзе пра нараду ў Аляксандра Лукашэнкі наконт выбарчага заканадаўства.

«Мы атрымалі паведамленьне з канцылярыі кіраўніка дзяржавы з датай буйной нарады ў прэзыдэнта 20 сакавіка. Таксама атрымалі пэўныя даручэньні да яе, чым цяпер і займаемся.

Гэта будзе вялікая размова пра зьмены выбарчага заканадаўства. ЦВК падсумавала прапановы, якія раней падрыхтавала міжведамасная камісія. На мой погляд, перамены ў арганізацыі і правядзеньні выбараў у нашай краіне будуць. Усё пытаньне, у якой ступені яны стануць радыкальнымі.

Я не выключаю, што на нарадзе можа адбыцца сутыкненьне інтарэсаў. Там будуць шырока прадстаўленыя рэгіёны. А мой досьвед пераконвае, што па асобных пытаньнях пазыцыя мясцовых уладаў кардынальна адрозьніваецца ад поглядаў Цэнтральнай выбарчай камісіі. Яны ўсё ж кансэрватыўныя, а мы значна больш лібэральныя.

Таму тут можа быць усялякае. Але ж у мяне ёсьць спадзяваньне, што рэгіянальныя прадстаўнікі разумеюць, што пытаньне пра выбарчае заканадаўства стала пытаньнем палітычным. Яно вельмі важнае для ўсёй краіны. Гэта ж робіцца не для Цэнтравыбаркаму.

Бліжэйшая выбарчая кампанія — у мясцовыя органы ўлады — пачнецца напрыканцы сёлетняга году. Мы прапаноўваем гэтыя выбары на люты 2018 году. І пакуль ніякіх пярэчаньняў на гэты конт ад уладаў няма.

Вядома, дапаўненьні і зьмяненьні да Выбарчага кодэксу закрануць і мясцовыя выбары. Але ж найперш яны скіраваныя на выбары прэзыдэнта і Нацыянальнага сходу», — сказала Ярмошына.

Наколькі радыкальнымі будуць зьмены, стане вядома роўна праз два тыдні. Але, як раней паведамляла Свабода, Цэнтравыбаркам адхіліў прапанову апазыцыі аб перафарматаваньні датэрміновага галасаваньня. А дэпутатка Палаты прадстаўнікоў Ганна Канапацкая, якая прысутнічала на заключным паседжаньні міжведамаснай экспэртнай групы, выказала меркаваньне, што перамены «хутчэй будуць касмэтычнымі, чым прынцыповымі».

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG