Лінкі ўнівэрсальнага доступу

Ва Ўкраіне раскрылі схему расейскага сцэнару па дэстабілізацыі сытуацыі


Старшыня СБУ Васіль Грыцак

Служба бясьпекі Ўкраіны ды Генэральная пракуратура правялі шэраг ператрусаў ва ўкраінскіх грамадзян, дзейнасьць якіх фінансавалася Расеяй у мэтах дэстабілізацыі ўнутранай сытуацыі ва Ўкраіне.

«Расея зьмяніла тактыку, яна пачала фінансаваць палітычную актыўнасьць у нашай дзяржаве. Адна з мэтаў — прыхаваная фэдэралізацыя», — заявіў старшыня СБУ Васіль Грыцак.

Паводле яго, расейскае фінансаваньне атрымлівалі каля дзясятка грамадзкіх арганізацый. Грыцак дадаў што ў гэтых схемах задзейнічаныя дэпутаты розных узроўняў і былыя высокапастаўленыя чыноўнікі.

«Мэханізм дзеяньня — круглыя сталы, форумы, кангрэсы з наступнымі зваротамі да Вярхоўнай Рады, прэзыдэнта, каб стварыць ілюзію масавай падтрымкі пэтыцый. За грашовае ўзнагароджаньне спэцслужбы Расеі залучаюць дэпутатаў розных узроўняў», — удакладніў ён.

Паводле інфармацыі СБУ, арганізатарамі гэтай дзейнасьці на тэрыторыі Ўкраіны былі памочнік былога міністра адукацыі і навукі Дзьмітрыя Табачніка Антон Кузьменка і былы галоўны рэдактар запароскага аддзяленьня прарасейскага інфармагенцтва «Новы рэгіён» Павел Залатароў, а таксама чальцы праекту «Ўкраінская фэдэрацыя», ініцыяванага грамадзкім рухам Віктара Медзведчука «Ўкраінскі выбар».

XS
SM
MD
LG