Лінкі ўнівэрсальнага доступу

Краіны Балтыі будуць дамагацца ад NATO ўзмацненьня бясьпекі праз расейскія вучэньні


Даля Грыбаўскайце
Даля Грыбаўскайце

Прэзыдэнт Літвы Даля Грыбаўскайце заяўляе, што краіны Балтыі будуць дамагацца дадатковых мераў бясьпекі ад ЗША і NATO ў сувязі з маштабнымі расейскімі вайсковымі вучэньнямі, якія павінны адбыцца ў верасьні.

«Мы бачым, што рызыкі ўзрастаюць. Мы занепакоеныя вучэньнямі „Захад“ у 2017 годзе, падчас якіх будуць разгорнутыя вялікія і агрэсіўныя войскі ўздоўж нашых межаў, якія дэманстратыўна будуць рыхтавацца да вайны з Захадам», — заявіла Грыбаўскайце 9 лютага пасьля сустрэчы з прэзыдэнтамі Эстоніі і Латвіі ў Рызе.

«Гэта азначае, што мы будзем гаварыць з NATO пра распрацоўку дадатковых плянаў бясьпекі і больш хуткі працэс прыняцьця рашэньняў», — адзначыла Грыбаўскайце.

Вучэньні «Захад» маюць праходзіць у тым ліку на тэрыторыі Беларусі. Расея доўгі час не адказвала, навошта Мінабароны РФ зьбіраецца замовіць у 2017 годзе больш за 4 тысячы вагонаў для вайсковых перавозак у Беларусь. Вайсковы экспэрт Аляксандар Алесін выказваў меркаваньне, што «жарты скончыліся» і расейцы будуць адпрацоўваць пэўнае рэальнае перакідваньне вялікага войска. Пазьней Мінабароны Расеі запэўніла, што абʼём вайсковых чыгуначных перавозак 2017 году параўнальны з абʼёмам перавозак падчас праведзеных на тэрыторыі Беларусі вучэньняў папярэдніх гадоў. У час «Вялікай размовы з прэзыдэнтам» Аляксандар Лукашэнка выказваў сумневы, што Расея будзе «ваяваць на чыгуначных плятформах».

«Як войскі будуць ўведзеныя, так роўненька адсюль і пойдуць», — што будзе на манэўрах «Захад-2017» і пасьля іх

На пачатку ліпеня 2016 году на саміце ў Варшаве лідэры альянсу пагадзіліся на разгортваньне дадатковых падразьдзяленьняў уздоўж усходняга флянгу абароннага саюзу ў адказ на агрэсіўныя дзеяньні Расеі.

Краіны Балтыі — Літва, Латвія і Эстонія — выказваюць занепакоенасьць у сувязі з магчымай агрэсіяй Расеі пасьля анэксіі Масквой украінскага Крыму і падтрымку сэпаратыстаў на Данбасе.

Усе тры балтыйскія краіны ўваходзілі ў СССР і далучыліся да NATO ў 2004 годзе. Яны таксама падпісалі з ЗША двухбаковыя пагадненьні аб бясьпецы, якія палягчаюць разгортваньне на іх тэрыторыі войскаў і тэхнікі.

Абраны прэзыдэнт ЗША Дональд Трамп назваў саюз NATO «састарэлым», што ўзмацніла неспакой ва ўсходняй частцы Эўропы.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG