Лінкі ўнівэрсальнага доступу

Ульляне Захаранцы 93 гады. Зь іх 18 яна пражыла бязь вестак пра сына


Ульляна Захаранка, здымак 2016 году
Ульляна Захаранка, здымак 2016 году

6 лютага Ўльляне Захаранцы, маці зьніклага экс-міністра ўнутраных спраў Беларусі Юрыя Захаранкі, споўнілася 93 гады.

Ульляна Рыгораўна па-ранейшаму жыве ў мястэчку Васілевічы Рэчыцкага раёну.

«Памаленьку жыву, — кажа Ўльляна Рыгораўна Свабодзе. — Пляменьніца Люба мяне даглядае. У доме парадак — цёпла, прыбрана. Чакаю толькі якіх зьвестак пра Юру, але не атрымліваецца. Дзякуй усім шчырым людзям, што мяне не забываюць, тэлефануюць, наведваюць, віншуюць з днём народзінаў».

Напярэдадні ў Васілевічы прыяжджалі Раіса Міхайлоўская зь Беларускага дакумэнтальнага цэнтру і Алег Воўчак, кіраўнік «Прававой дапамогі насельніцтву». Яны дапамаглі Ўльляне Захаранцы праз інтэрнэт наладзіць відэасувязь з унучкай Аленаю, якая з маці і сястрой жыве ў эміграцыі ў Нямеччыне.

Пляменьніца Люба распавяла, што Ўльляна Рыгораўна была надзвычай рада магчымасьці пабачыцца з унучкаю, старэйшаю дачкою Юрыя.

Пасьля выкраданьня невядомымі ў красавіку 1999 года экс-міністра ўнутраных спраў, генэрала Юрыя Захаранкі ўлады доўгі час не хацелі прызнаваць Ульляну Рыгораўну пацярпелай. На заявы маці, а таксама жонкі Юрыя Вольгі, якая з дочкамі эмігравала ў Нямеччыну, суды адмаўляюцца прызнаць Захаранку памерлым.

На думку Алега Воўчака, гэта было б прызнаньнем «асабістай паразы Лукашэнкі», таму сыстэма робіць усё, каб гэтага не адбылося.

Сьледчы камітэт, нягледзячы на тое, што з моманту зьнікненьня экс-міністра мінула амаль васямнаццаць гадоў, пэрыядычна працягвае расьледаваньне справы зьнікненьня Юрыя Захаранкі. Суды, у сваю чаргу, ня могуць вынесьці рашэньне наконт прызнаньня Юрыя Мікалаевіча памерлым, бо фармальна расьсьледаваньне яшчэ ня скончана.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG