Марын Лё Пэн запэўніла, што ў выпадку перамогі ў першыя шэсьць месяцаў прэзыдэнцтва яна правядзе рэфэрэндум аб сяброўстве Францыі ў Эўрапейскім зьвязе. Яна таксама назвала выхад Вялікабрытаніі з ЭЗ і перамогу Дональда Трампа на выбарах прэзыдэнта ЗША перадумовамі для свайго посьпеху.
Першы тур прэзыдэнцкіх выбараў у Францыі пройдзе 23 красавіка. Паводле апошніх апытаньняў, Лё Пэн можа набраць найбольшую колькасьць галасоў у першым туры выбараў, але наўрад ці пераможа ў другім. На прэзыдэнцкіх выбарах 2012 году Лё Пэн заняла трэцяе месца, набраўшы амаль 18 адсоткаў галасоў.
Чакаецца, што галоўным канкурэнтам Лё Пэн ў перадвыбарнай гонцы будзе незалежны цэнтрыст Эмануэль Макрон, які выступае ў падтрымку захаваньня Францыі ў складзе Эўразьвязу. Кандыдат ад правацэнтрыстаў Франсуа Фіён пасьля фінансавага скандалу, у які апынулася ўцягнутая ягоная жонка, значна саступіў апанэнтам ў рэйтынгу.