У нядзелю, 5 лютага, Бэнуа Амона афіцыйна вылучылі кандыдатам ад Сацыялістычнай партыі на пасаду прэзыдэнта Францыі. Тыдзень таму гэты 49-гадовы палітык, які лічыўся аўтсайдэрам, стаў пераможцам праймэрыз левых, набраўшы 58,69% галасоў у другім туры.
Яго супернік, былы прэмʼер Манюэль Вальс, на цырымоніі не прысутнічаў.
За тыдзень рэйтынг Бэнуа Амона павялічыўся прыкладна на 10% — да 16-17%.
Кандыдат у прэзыдэнты Францыі Франсуа Фіён, які лічыўся адным з фаварытаў прэзыдэнцкай гонкі, сутыкаецца зь ціскам з боку ўласных аднапартыйцаў — кандыдата ад кансэрватараў, які ўпаў у вачах выбаршчыкаў з-за скандалу зь нібыта «фіктыўным працаўладкаваньнем» жонкі, патрабуюць замяніць, паведамляе Reuters 5 лютага.
Рэйтынг кандыдата ад правых і цэнтрыстаў Франсуа Фіёна ўжо ўпаў да 20%. Паводле апытаньняў, ён адстае ад лідэра правай партыі Францыі Нацыянальны фронт Марын Лё Пэн і былога міністра эканомікі Эмануэля Макрона. Прычынай падзеньня рэйтынгу стала гісторыя пра «фіктыўнае працаўладкаваньне» жонкі кандыдата, што актыўна абмяркоўваецца ў СМІ — Пэнэлопа Фіён, якая працуе з мужам у палітыцы ад 1980 году, атрымала € 500 тысяч у пэрыяд з 1998 па 2002 год.
