Падзеі 30 сьнежня ў беларускай і ўсясьветнай гісторыі, а таксама афіша на сёньня.
Дата дня
30 сьнежня 1937 году ў Менску органы НКВД расстралялі Аляксандра Цьвікевіча, беларускага палітыка, гісторыка, публіцыста, міністра замежных справаў ва Ўрадзе БНР.
Таксама ў гэты дзень
1667 — закрытая Віленская мынца (манэтны двор). З канца XV стагодзьдзя яна была асноўным цэнтрам манэтнай прамысловасьці Вялікага Княства Літоўскага.
1806 — Турэччына абвяшчае вайну Расеі. Расея займае Баку.
1842 — у дачыненьні да Беларусі ўпершыню быў ужыты расейскі імпэрскі тэрмін «Северо-Западный край».
1918 — 6-я Паўночна-Заходняя канфэрэнцыя РКП(б) у Смаленску абвясьціла сябе І зьездам Камуністычнай партыі (бальшавікоў) Беларусі, а таксама прыняла пастанову «Аб абвяшчэньні Заходняй камуны Беларускай савецкай рэспублікай», г. зн. аб стварэньні Савецкай сацыялістычнай рэспублікі Беларусі (пазьней Беларуская ССР).
1922 — Беларусь уключылі ў склад СССР. І Усесаюзны зьезд саветаў прыняў дэклярацыю і дамову аб утварэньні СССР.
1966 — улады БССР прынялі пастанову аб выданьні «Беларускай савецкай энцыкляпэдыі».
1990 — пачаўся рэгулярны рух цягнікоў па другой лініі Менскага мэтрапалітэну ад станцыі «Трактарны завод» да станцыі «Фрунзэнская».
1992 — Беларусь завязала дыпляматычныя дачыненьні зь Літвой.
2004 — Міхаіла Марыніча, былога беларускага міністра і пасла, засудзілі на 5 гадоў турмы за нібыта скрадзеныя кампутары.
2006 — пакараны сьмерцю былы дыктатар Іраку Садам Хусэйн.
У гэты дзень нарадзіліся
1865 — Рэд’ярд Кіплінг, ангельскі пісьменьнік, ляўрэат Нобэлеўскай прэміі ў літаратуры.
1880 — Антон Баначыч, беларускі сьпявак і пэдагог.
1904 — Зэлік Аксельрод, беларускі габрэйскі паэт, перакладнік беларускай паэзіі на ідыш.
У памяці
1944 — Рамэн Ралян, францускі пісьменьнік, ляўрэат Нобэлеўскай прэміі ў літаратуры.
1984 — Макар Пасьлядовіч, беларускі пісьменьнік і перакладнік.
Куды варта пайсьці ды за чым сачыць 30 сьнежня
Праект Сяргея Міхалка «Ляпіс-98» з канцэртам у менскім клюбе Prime Hall. Выступы ў складзе «Ляпіс-98» стануць першымі канцэртамі Міхалка ў Менску зь 2010 году. У кастрычніку Сяргей Міхалок разам з гуртом Brutto даў вялікі канцэрт у Гомлі.
Квіткі на канцэрт 30 сьнежня раскупілі менш як за дзень, таму паўторны канцэрт «Ляпісаў» пройдзе 13 студзеня.
Рэвалюцыйная эвалюцыя Міхалка: 22 песьні, якія варта пераслухаць
Сяргей Міхалок зьехаў зь Беларусі празь ціск КДБ — яму пагражала крымінальная справа за абразу Лукашэнкі. Пасьля падзелу гурту «Ляпіс Трубяцкі» на Brutto і Trubetskoy першыя практычна адмовіліся ад старых песень, а другія іх выконвалі разам з новым матэрыялам. Праект «Ляпіс-98» нарадзіўся ў красавіку і выконвае старыя песьні гурту «Ляпіс Трубяцкі», хоць граюць у ім ужо іншыя музыкі.
Мастацтва і гісторыя
Акцыя «Захаваць мастацтва»
30 сьнежня — завяршальны дзень акцыі «Захаваць мастацтва», падчас якой можна бясплатна пабываць у сталічных музэях. Без квітка можна будзе наведаць Нацыянальны гістарычны музэй, «Галерэю ДК», Музэй гісторыі тэатральнай і музычнай культуры, а таксама палац Румянцавых-Паскевічаў у Гомлі.
Гасьцёўня Ўладзіслава Галубка
Гісторыкі запрашаюць дзяцей ды іхных бацькоў на «Навагодні калейдаскоп». У праграме загадкі, песьні, знаёмства з батлеечнымі лялькамі, карагоды, падарункі.
Менск, Музэй тэатральнай і музычнай гісторыі (вул. Старавіленская, 14).
Пачатак а 15-й гадзіне.
Неабходны папярэдні запіс.
Тэлефон для даведак: +375 17 286-74-03