Расейскі пасол памёр пасьля нападу ў Анкары, паведаміла прэс-сакратарка расейскага Міністэрства замежных спраў Марыя Захарава.
Раней турэцкі дзяржаўны тэлеканал TRT World паведаміў, што амбасадара Андрэя Карлава цяжка паранілі падчас прамовы на адкрыцьці фотавыставы «Расея вачыма туркаў» у Цэнтры сучаснага мастацтва ў Анкары. Ёсьць іншыя параненыя. Паліцыя застрэліла нападніка.
Паводле турэцкай газэты Hürriyet, нападнік паказаў пасьведчаньне паліцыянта, каб прайсьці на выставу. Пазьней крыніцы ў турэцкіх сілах бясьпекі паведамілі агенцтву Reuters, што ён сапраўды паліцыянт, але ў момант нападу ня быў пры выкананьні службовых абавязкаў.
Першы стрэл невядомы нібыта зрабіў ў паветра, пасьля чаго адкрыў агонь па амбасадару.
Агенцтва AFP паведамляе, са спасылкай на сьведкаў, што нападнік крычаў словы «Алепа!» і «помста!»
На 20 сьнежня была заплянаваная сустрэча паміж прэмер-міністрамі Ірану, Расеі і Турэччыны, каб абмеркаваць сытуацыю ў Сырыі.
