Паводле слоў Дзёміна, 14 сьнежня ў камапніі прайшла чарговая нарада для абмеркаваньня ўстаноўленых Беларусьсю тарыфаў на транспарціроўку нафты на 2017 год. У ёй узялі ўдзел кіраўнікі «Гомельтранснафты Дружба» Сяргей Сасноўскі і «Полацктранснафта Дружба» Васіль Дробатаў. Ад кампаніі «Транснефть» вёў перамовы віцэ-прэзыдэнт Сяргей Андронаў.
Раней Беларусь інфармавала «Транснеть» пра намер павысіць тарыф на транспарціроўку нафты на 20,5%. Новыя тарыфы павінны быць устаноўлены з 1 лютага 2017 года.
Сёлета Беларусь ужо зьбіралася павысіць тарыфы на транзыт расейскай нафты. Дакумэнт аб іх павышэньні ў сярэднім на 50% павінен быў набыць моц 11 кастрычніка, аднак напярэдадні, 10 кастрычніка, віцэ-прэм’ер Беларусі Ўладзімір Сямашка паведаміў пра адмену павышэньня тарыфаў на транзыт расейскай нафты ў абмен на аднаўленьне аб’ёмаў паставак нафты з Расеі.
Згодна зь беларуска-расейскімі дамоўленасьцямі наконт вырашэньня нафтагазавага канфлікту да 20 кастрычніка Менск павінен быў пералічыць 281 млн даляраў у якасьці запазычанасьці за пастаўлены расейскі прыродны газ. Аднак гэтага не адбылося.
Чакалася, што пытаньне будзе ўрэгуляванае пасьля візыту ў Менск прэм’ер-міністра Расеі Дзмітрыя Мядзьведзева 28 кастрычніка, а таксама пасьля сустрэчы Аляксандра Лукашэнкі з Уладзімірам Пуцінам 22 лістапада ў Маскве.
8 сьнежня Беларусь ажыцьцявіла авансавы плацёж за пастаўку расейскага газу.
15 сьнежня пасол Расеі Аляксандр Сурыкаў заявіў журналістам у Менску, што нафтагазавая спрэчка Беларусі і Расеі будзе вырашаная да 20 сьнежня. Пасьля гэтага будуць адноўленыя пастаўкі нафты ў краіну і аплата Беларусьсю расейскага газу.
Пра гэта інфармуе агенцтва БелаПАН.