Абраны прэзыдэнт Дональд Трамп прызначыць генэральнага дырэктара ExxonMobil Рэкса Тылерсана дзяржаўным сакратаром ЗША.
У афіцыйнай заяве пераходнай каманды Трампа гаворыцца, што «яго ўпартасьць, багаты досьвед і глыбокае разуменьне геапалітыкі робіць яго выдатным выбарам для дзяржсакратара. Ён будзе спрыяць рэгіянальнай стабільнасьці і засяродзіцца на асноўных інтарэсах нацыянальнай бясьпекі Злучаных Штатаў.»
Выбар можа стаць прычынай канфлікту абранага прэзыдэнта з Кангрэсам пры зацьвярджэньні Тылерсана, паколькі сэнатары занепакоеныя сувязямі Тылерсана з прэзыдэнтам Расеі Уладзімірам Пуціным. Вядучыя рэспубліканцы ўжо выказалі занепакоенасьць з нагоды Тылерсана.
Дзьве сустрэчы з Тылерсанам зрабілі ўражаньне на Трампа, і ён назваў Тылерсана «гульцом сусьветнай клясы» ў інтэрвію «Fox News Sunday».
Як кіраўнік ExxonMobil Тылерсан падтрымліваў цесныя сувязі з Расеяй і быў узнагароджаны прэзыдэнтам Уладзімірам Пуціным ордэнам Дружбы ў 2013 годзе, што зьяўляецца высокай узнагародай для замежнага грамадзяніна. Тылерсан выступае за зьняцьце санкцый з Расеі.