Людзі прыбралі тэрыторыю каля крыжа, усклалі кветкі, запалілі зьнічкі ды памаліліся за спачылых, кажа кіраўнік баранавіцкай суполкі ТБМ Мікалай Падгайскі:
«Неабыякавыя людзі прышлі да крыжа „Ахвярам гвалту 1939-1953 гг.“, што стаіць у сквэры ля вуліцы Смаленскай. Гэта менш за 100 мэтраў ад былой сумна вядомай турмы „Крывое Кола“, дзе сталінскія каты мучылі і забівалі нявінных людзей».
Каля крыжа актывісты прыбралі апалае лісьце, потым чыталі вершы рэпрэсаваных паэтаў, а краязнаўцы распавялі гісторыю ўсталяваньня крыжа, пасьля чаго адслужылі літыю за спачын ды прасьпявалі гімн «Магутны Божа».
Крыж-помнік ахвярам сталінскіх рэпрэсіяў быў усталяваны актывістамі ў 1992 годзе ў цэнтры Баранавічаў. Аднак потым невядомыя патаемна перанесьлі яго на тэрыторыю былой турмы, дзе, паводле дасьледчыкаў, з 1939-га па 1941 год НКВД расстраляла некалькі тысяч чалавек.
Летась невядомыя апаганілі крыж ахвярам рэпрэсіяў, спаліўшы вянок ля яго. Міліцыя закрыла справу, ня здолеўшы высьветліць асобы вандалаў.
