Лінкі ўнівэрсальнага доступу

Ці надоўга спынена будаўніцтва копіі Сафійскага сабору, віцяблянам ня кажуць


Абвестка пра сустрэчу

На імпрэзу ў Духаўскі круглік запрашалі ўсіх, хто цікавіцца пэрспэктывамі разьвіцьця абласнога цэнтру. Нягледзячы на тое, што сустрэчу прызначылі ў працоўны час, сабраліся больш за сотню людзей, а таксама больш як дзясятак журналістаў.

На сустрэчу сабраліся больш за сотню неабыякавых гараджан
На сустрэчу сабраліся больш за сотню неабыякавых гараджан

Большасьць прысутных хацела пачуць менавіта пра лёс «замарожанага» будаўніцтва сабору — копіі полацкай Сафіі ўзору ХІ стагодзьдзя. Аднак пытаньні на гэтую тэму выклікалі непрыхаванае раздражненьне ў прадстаўніка аддзелу архітэктуры гарвыканкаму спадара Багданава.

Выступае Леанід Багданаў
Выступае Леанід Багданаў

Зрэшты, раздражняўся Леанід Багданаў з нагоды любога пытаньня, якое пачыналася словамі «Калі ў Віцебску нарэшце пабудуюць...» Напрыклад, актывістка Тацяна Севярынец запыталася, ці яшчэ доўга чакаць жыхарам новых мікрараёнаў Білева запраектаваных паліклінікі, школы і дзіцячых садкоў. А таксама сьмецьцеперапрацоўчага камбінату, які мусіў запрацаваць ужо шмат гадоў таму.

Пытаньне задае Тацяна Севярынец
Пытаньне задае Тацяна Севярынец

Спадар Багданаў адказаў, што праекты — гэта адно, а фінансаваньне — зусім іншае, што архітэктары толькі рыхтуюць праекты, а за тое, каб яны ўвасабляліся, не адказваюць. Таму аніякай канкрэтнай размовы не атрымалася. Прадстаўнік аддзелу архітэктуры расказаў, у якіх раёнах гораду будзе разьвівацца жыльлёвае будаўніцтва, а на самае трывожнае пытаньне — пра Сафійскі сабор — так і не адказаў.

Зрэшты, адну новую акалічнасьць пра гэтае будаўніцтва гараджане ўсё ж пачулі. І гэта прагучала ўпершыню: нібыта ў парку паміж вуліцамі Чэхава і Ўрыцкага ўжо даўным-даўно было вырашана збудаваць «аб’ект сацыяльнага прызначэньня». Мясцовыя жыхары ніколі пра гэта ня чулі і чарговы раз абурыліся тым, што пляны гарадзкой забудовы ніколі не абмяркоўваюцца з грамадзкасьцю.

На сустрэчы прыйшлі спадарыні з блізкіх да будаўніцтва дамоў
На сустрэчы прыйшлі спадарыні з блізкіх да будаўніцтва дамоў

Вось і цяпер невядома, ці пагадзілася Віцебская эпархія на прапановы гарвыканкаму, выказаныя пасьля масавых пратэстаў супраць будаўніцтва копіі Сафійскага сабору ў гарадзкім парку. Гарвыканкам прапанаваў перанесьці сабор на 36 мэтраў і зьмяніць трасу камунікацый, каб мінімалізаваць зону высяканьня дрэў, адмовіцца ад аўтастаянкі каля будынка і ў 3,5 раза зьменшыць агульную плошчу офісных памяшканьняў, запраектаваных пад храмам. Рэакцыя на прапановы невядомая, і гэта хвалюе віцяблян: яны разумеюць, што, апрача будаўніцтва копіі сабору, эпархія вельмі зацікаўлена менавіта ў гэтых «падземных» пабудовах, сярод якіх «заля шматфункцыянальнага прызначэньня з вэстыбюлем, прыбіральнямі для наведнікаў, дапаможнымі памяшканьнямі; заля ўрачыстых прыёмаў і абрадаў, гардэробы для сьвятароў, трапэзная з кухняй, памяшканьні тэхнічнага прызначэньня».

На пытаньні, да якой пары прыпынілі будаўніцтва і ці прыбяруць будаўнічую агароджу, што разьмежавала парк, Леанід Багданаў паўтараў адно: «Вам пра гэта паведамяць». Якім чынам, не ўдакладняў.

Крыху яснасьці віцяблянам даў нядаўні артыкул у абласной газэце «Витебские вести», якая працытавала словы старшыні аблвыканкаму Мікалая Шарсьнёва: «Гэтая тэрыторыя, без сумневу, вымагае таго, каб яе добраўпарадкавалі. Але пакуль ня вырашана пытаньне з крыніцамі фінансаваньня будаўніцтва храму (на гэтыя мэты не прадугледжаны і ня будуць выкарыстоўвацца сродкі зь бюджэту), размову пра пачатак будаўніцтва весьці зарана».

Аднак віцябляне на ўласныя вочы бачылі «пашпарт аб’екта», ужо зьняты з плоту, дзе ў якасьці тэрміну пачатку будаўніцтва быў пазначаны верасень гэтага году. А скончыць узьвядзеньне сабору плянавалі надзвычай хутка — праз два гады... Яшчэ нядаўна віцяблянам абяцалі, што спонсарам будаўніцтва стане расейскі «Газпром», але цяпер тыя, хто гэта дэкляраваў, адмаўляюцца ад сваіх слоў. А жыхары гораду катэгарычна супраць, каб падобныя аб’екты будаваліся за іхны кошт — за сродкі ад «добрахвотных суботнікаў» і пабораў з прадпрымальнікаў.

Дзяўчына, якая прынесла абраз
Дзяўчына, якая прынесла абраз

Ну сустрэчы з Леанідам Багданавым выразна дэманстравала сваё жаданьне ўбачыць у парку новы сабор толькі адна дзяўчына. Яна прыйшла са скручаным папяровым абразом і час ад часу яго разгортвала.

Пасьля сустрэчы спадара Багданава працягвалі распытваць пра сабор
Пасьля сустрэчы спадара Багданава працягвалі распытваць пра сабор

Увагі на гэта амаль ніхто не зьвяртаў: усе былі ўражаныя словамі намесьніка архітэктара пра тое, што ў горадзе няма грошай на ўвасабленьне пераважнай большасьці праектаў, ужо даўно зробленых і зацьверджаных, у тым ліку некаторых — асабіста Аляксандрам Лукашэнкам. Але сродкаў няма ні на паліклінікі, ні на школы, ня кажучы ўжо пра абяцаны гараджанам аквапарк або Паўночны мост цераз Дзьвіну, пра які вядзецца яшчэ ці не з савецкіх часоў.

Ваша меркаваньне

Паказаць камэнтары

XS
SM
MD
LG