Лінкі ўнівэрсальнага доступу

Віцебскі гарвыканкам прапануе зьменшыць плошчу Сафійскага сабору, а гараджане хочуць, каб сабору не было зусім


За плотам — пляцоўка, дзе спынілася будаўніцтва
За плотам — пляцоўка, дзе спынілася будаўніцтва

Жыхары Віцебску атрымалі адказ на свой калектыўны зварот да мясцовых уладаў, у якім выклалі аргумэнты супраць узьвядзеньня копіі полацкага Сафійскага сабору ўзору XI стагодзьдзя. Ліст яны накіроўвалі ў аблвыканкам, аднак чыноўнікі яго пераадрасавалі, і адказ прыйшоў зь Віцебскага гарвыканкаму.


У лісьце за подпісам намесьніка старшыні гарвыканкаму Дзьмітрыя Шэрыкава паўтараецца тое ж, што віцябляне пачулі на нядаўняй сустрэчы зь віцебскімі чыноўнікамі — што будаўніцтва замарожана на няпэўны тэрмін.

Паводле гэтага допісу, гарадзкія ўлады прапануюць галоўныму ініцыятару ўзьвядзеньня сабору, віцебскай эпархіі праваслаўнай царквы, зрабіць шэраг зьменаў у праекце. У тым ліку перанесьці сабор на 36 мэтраў, каб мінімалізаваць зону вырубкі дрэваў у гарадзкім парку, і з той самай мэтай зьмяніць трасыроўку камунікацый. Таксама — адмовіцца ад аўтастаянкі каля будынку, зьменшыць плошчу ніжняга храму да памераў верхняга — уласна копіі полацкай Сафіі, скараціць тэрыторыю, на якой замест вынішчаных дрэваў плянаваліся брукаваныя дарожкі і пляцоўкі, і павялічыць колькасьць кампенсацыйных пасадак дрэваў у цэнтры гораду, а не на ўскраіне, як зьбіраліся прадстаўнікі эпархіі.

Тым ня менш, значную колькасьць апанэнтаў будаўніцтва прапанаваныя зьмены не задавальняюць. Пратэстна настроеная частка насельніцтва выступае супраць зьнішчэньня дрэваў у парку паміж вуліцамі Ўрыцкага і Чэхава ў прынцыпе — у любой колькасьці. Многія кажуць, што сабор-падробка не патрэбны Віцебску ўвогуле: у гэтым раёне й так функцыянуюць тры храмы, дзе нават у нядзельныя дні мала вернікаў.

А тым часам горадзе шмат «даўгабудаў», і ў іхным ліку царква сьвятога Архангела Міхаіла каля гіпэрмаркету «Грын», якую мусілі збудаваць да верасьня 2016 году, але мінакі бачаць адно толькі падмурак.

Жаданьне Віцебскай эпархіі ўвесьці ў горадзе Сафійскі сабор мясцовыя жыхары тлумачаць амбіцыйнасьцю мясцовага царкоўнага кіраўніцтва: маўляў, размова вядзецца пра аб’яднаньне з Полацкай эпархіяй, і ў Віцебску мае ўтварыцца мітраполія, якую й трэба «адзначыць» сымбалічным саборам-навабудам. Шмат хто адзначае, што гэты сабор — даніна расейскаму «Газпраму», які паабяцаў даць грошы http://www.svaboda.org/a/27215929.html на ўзьвядзеньне Сафіі ў Віцебску.

Праўда, вэрсыя пра мэцэнацтва «Газпрама» і яго кіраўніка ў апошні час аспрэчваецца гарадзкім кіраўніцтвам. Мала хто верыць і ў тое, што новы сабор будзе здольны прыцягнуць у Віцебск вялікую колькасьць турыстаў, як гэта дэкляруецца.


Віцебскі праваабаронца Леанід Сьвецік напісаў ліст у Віцебскі гарсавет, дзе прапануе правесьці гарадзкі рэфэрэндум, што да неабходнасьці ўзводзіць у абласным цэнтры копію былога полацкага храма. А выдаткі на правядзеньне ўскласьці на ініцыятара будаўніцтва, Віцебскую эпархію.

астка парка па-ранейшаму схаваная ад гараджан
астка парка па-ранейшаму схаваная ад гараджан



На сёньняшні дзень месца будаўніцтва сабора абгароджана плотам, за якім апынулася ці не палова парка, у якім, паводле першапачатковага праекту, да зьнішчэньня асуджаны 206 дрэваў. Праўда, брамы ў плоце ўжо няма. Зьнік і «Пашпарт аб’екта», які ўжо былі пасьпелі разьмясьціць на плоце.

Рэакцыя Віцебскай эпархіі на прапановы гарвыканкаму пакуль невядомая. Не атрымалі віцябляне і адказу на свой ліст да Аляксандра Лукашэнкі, у якім прасілі пакінуць парк у спакоі і падумаць пра мэтазгоднасьць новага сабору ўвогуле — у той час, калі ў Віцебску не будуюцца аб’екты, куды больш неабходныя гараджанам.


Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG