Старшыня рады дырэктараў кампаніі «Франдэса» Валер Дымент выйшаў на волю пасьля кампэнсацыі інкрымінаванай яму шкоды.
Пра гэта парталу tut.by паведаміў прэс-сакратар КДБ Дзьмітры Пабяржын.
Паводле Пабяржына, мера стрыманьня Валеру Дыменту зьмененая, бо ён поўнасьцю прызнаў сваю віну і кампэнсаваў шкоду.
Паводле парталу «Ежедневник», Дымент кампэнсаваў толькі частку шкоды, а астатнія грошы абяцае яшчэ сабраць.
Раней старшыня КДБ Валеры Вакульчык сказаў журналістам, што бярозаўская кампанія «Франдэса», якая распрацоўвае і вырабляе хімічныя сродкі абароны расьлін, вывела зь Беларусі праз афшор каля 45 млн даляраў.
«Франдэса» была пастаўленая ў адзін шэраг з кампаніямі «Консул», «Біяком» і «Сэрвалюкс» у рамках гучнай «кармавой справы».
Улетку гэтага году паводле ўказу кіраўніка краіны цэнтралізаваныя закупы сродкаў абароны расьлін былі перададзеныя пад кантроль дзяржаўнага холдынгу «Белрэсурсы».
У верасьні пад падпіску аб нявыезьдзе зь СІЗА КДБ быў вызвалены бізнэсовец Юры Чыж.