Лінкі ўнівэрсальнага доступу

Узровень занятасьці ў Беларусі абнавіў 12-гадовы мінімум


Згодна з новым выпускам агляду (PDF) Цэнтру сацыяльна-эканамічных дасьледаваньняў, узровень занятасьці насельніцтва ў Беларусі за першае паўгодзьдзе скараціўся на 80 тысяч і склаў 4,402 млн чалавек. Але беспрацоўных за першае паўгодзьдзе стала больш толькі на 4 тысячы (5% ад скарачэньня колькасьці занятых).

Гэта мінімальны паказьнік для Беларусі, пішуць дасьледчыкі: ранейшы мінімум быў у 2004 годзе — 4,420 млн чалавек. Максымум назіраўся ў 2009 годзе, калі ўзровень занятасьці склаў 4,695 млн чалавек.

«Заваяваньні пяцігодкі 2005–2010 гадоў, якая ўвайшла ў гісторыю як пяцігодка высокіх тэмпаў росту ВУП і занятасьці, цалкам страчаныя, — робяць выснову дасьледчыкі. — І гэта без уліку пастаянных з 2012 году зьменаў мэтадалёгіі ўліку працоўных рэсурсаў, дзякуючы якім занятасьць нязьменна папаўнялася на пару дзясяткаў тысяч — апошнім разам, напрыклад, „далічылі“ рамесьнікаў.

У гэтым годзе, падобна, будзе ўсталяваны яшчэ адзін антырэкорд — па дадаткова ўведзеных працоўных месцах у эканоміцы. Шосты год запар гэты паказьнік дэманструе падзеньне дынамікі. За першае паўгодзьдзе прынята на дадаткова ўведзеныя працоўныя месцы толькі 14,6 тысячы чалавек».

Другі год запар колькасьць працаўнікоў у вымушаных адпачынках вышэйшая, чым у час крызісу 2008–2010 гадоў, адзначаюць дасьледчыкі. Яны заўважаюць: простае стварэньне новых працоўных месцаў яшчэ ня кажа пра іх якасьць, бо за апошнія гады ў краіне зьявілася толькі 300–450 высокапрадукцыйных працоўных месцаў.

Разам з тым трэнд рэальнага ВУП у Беларусі зьніжаецца ўжо 41-шы квартал запар. Узровень рэальных зарплат называецца «дастаткова высокім», але падставы для яго росту — «не такімі ўжо відавочнымі». Інфляцыя запавольваецца, але Беларусь захоўвае лідэрства па ёй сярод краінаў СНД. Дывэрсыфікацыя экспарту тавараў фактычна правальваецца.

Глядзець камэнтары (1)

Гэтая дыскусія закрытая.
Ігар Лосік Кацярына Андрэева Дар'я Чульцова Марына Золатава Ягор Марціновіч
XS
SM
MD
LG