Беларусь можа чакаць той жа лёс, што і Ўкраіну. Пра гэта заявіў палітык, дыплямат, былы прадстаўнік Украіны ў палітычнай падгрупе Трохбаковай кантактнай групы Раман Бясьсьмертны ў эфіры праграмы «Вялікае інтэрвію» зь Яўгенам Кісялёвым на тэлеканале NewsOne.
Паводле словаў Бясьсьмертнага, у Беларусі ўжо нарастае напружаньне, аднак разьвіцьцё падзеяў будзе залежаць ад тых людзей, якія будуць кіраваць дзяржавай.
Разам з тым Бясьсьмертны падкрэсьліў, што ў Крамля ўжо падрыхтаваны плян. Так, як Украіна дзеліцца на ўсход і захад, так будзе дзяліцца і Беларусь, — працытаваў пазыцыі Расеі дыплямат.
Пры гэтым ён адзначыў, што Віцебск і Менск — гэта ўсход, а Берасьце і Горадня — захад.
Таксама Бясьсьмертны зазначыў, што Аляксандар Лукашэнка спрабуе выратаваць сябе:
«Ён ужо даўно дзейнічае ў тых рамках, у якіх яму дазваляе Крэмль. Сёньня Беларусь — гэта перавалачная база для расейскага экспарту ў Эўропу. Паглядзіце на экспарт Беларусі ў Галяндыю — гэта гаруча-змазачныя матэрыялы, якія прыходзяць у Беларусь з Расеі, ну і потым адпраўляюцца ў Галяндыю. І гэта ўсё ў абыход санкцыяў, і гэтая сыстэма працуе», — адзначыў Бясьсьмертны.
