Лінкі ўнівэрсальнага доступу

Доктар, якога пры затрыманьні зьбілі, не вінаваты


Дзьмітры Серада
Дзьмітры Серада

Сьледчы камітэт паведаміў, што пэдыятар Дзьмітры Серада, якога гвалтоўна затрымалі на паўтара сутак, не дачынны да злачынства.

Прадстаўніца Сьледчага камітэту Юлія Ганчарова сказала, што Заводзкім раённым аддзелам Сьледчага камітэту ў Менску расьсьледуецца крымінальная справа па факце хуліганскіх дзеяньняў, якія выявіліся ў дэманстрацыі палавых органаў жанчынам у лесапаркавай зоне.

«У мэтах устанаўленьня асобы, якая ўчыніла гэтае злачынства, органам дазнаньня праводзіўся шэраг апэратыўна-вышуковых мерапрыемстваў, падчас якіх паступіла інфармацыя пра магчымую дачыннасьць Серады да згаданага злачынства. Супрацоўнікамі міліцыі было зьдзейсьнена яго затрыманьне», — распавяла Юлія Ганчарова.

Доктара Сераду даставілі ў раённы аддзел Сьледчага камітэту, дзе сьледчыя цягам сутак правяралі інфармацыю, якая паступіла ад апэратыўных службаў.

«Інфармацыя не знайшла пацьверджаньня, пасьля чаго мужчына быў адпушчаны», — сказала Ганчарова.

Жонка Дзьмітрыя Серады напісала скаргу на дзеяньні супрацоўнікаў міліцыі пры затрыманьні. Цяпер па ёй праводзіцца перадсьледчая праверка.

Паводле Дзьмітрыя Серады, да яго ў кватэру 4 жніўня ўварваліся невядомыя ў масках, выламалі ўваходныя дзьверы, разьбілі шкло бальконных дзьвярэй на кухні. Дзьмітрыя жорстка зьбілі, завезьлі ў Заводзкі РУУС, потым у Сьледчы камітэт. Трымалі паўтара сутак, не кармілі. Пра гэта Дзьмітры Серада распавёў праваабарончаму цэнтру «Вясна».

Зьбівалі лекара жорстка: паклалі тварам у падлогу, скруцілі рукі за сьпіну, надзелі кайданкі. Потым білі нагамі ў абутку па галаве, нырках, сьпіне, нагах. Спадар Серада кажа, што на пытаньне, за што яго зьбіваюць, пачуў у адказ: «„Няма чаго сваімі прычындаламі махаць“, у больш грубай форме, вядома». Потым лекара даставілі ў РУУС Заводзкага раёну Менску, у машыне працягвалі зьбіваць.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG