Паводле сьпікера памежнікаў Алега Слабадзяна, пераважна мяжу перасякаюць украінцы, якія выяжджаюць з Крыму. У крымскім накірунку толькі ў Чангары ёсьць невялікая чарга з 14 аўтамабіляў.
Разам з тым вайсковая выведка Ўкраіны заяўляе пра павелічэньне пагрозы паветранага тэрарызму над тэрыторыяй Данбасу.
Прадстаўнік Галоўнага ўпраўленьня выведкі Міністэрства абароны Ўкраіны Вадзім Скібіцкі зьвязвае гэткую небясьпеку з атрыманай інфармацыяй пра перамяшчэньне з Расеі на Данбас зэнітна-ракетнага дывізіёну са складу 60-й асобнай мотастралковай брыгады, што дысьлякуецца ў населеным пункце Манастырышча Прыморскага краю.
«Вайсковая выведка Ўкраіны ўстанавіла, што зэнітна-ракетны дывізіён 60-й асобнай мотастралковай брыгады налічвае ў сваім складзе 168 чалавек, 21 адзінку баявой тэхнікі і 30 аўтамабіляў. Асабісты склад дывізіёну — выключна афіцэры і вайскоўцы па кантракце», — паведаміў прадстаўнік украінскай выведкі.
Паводле Вадзіма Скібіцкага, на ўзбраеньні гэтага дывізіёну знаходзяцца звышсучасныя магутныя комплексы супрацьпаветранай абароны ТОР-М2, ня менш эфэктыўныя пры баявым выкарыстаньні, чым зэнітна-ракетны комплекс «Бук», зь якога быў зьбіты малайзійскі самалёт Boeing 777.
На мінулым тыдні з прычыны абвастрэньня сытуацыі на адміністрацыйнай мяжы з Крымам і ў раёне правядзеньня антытэрарыстычнай апэрацыі Служба бясьпекі Ўкраіны абвясьціла «чырвоны» ўзровень тэрарыстычнай пагрозы для Данецкай, Луганскай абласьцей і Крыму, і «жоўты» для Запароскай, Мікалаеўскай, Адэскай, Сумскай, Харкаўскай, Херсонскай і Чарнігаўскай абласьцей.
У адпаведнасьці з украінскім заканадаўствам «чырвоны» ўзровень азначае рэальную пагрозу, а «жоўты» — імаверную. У абодвух выпадках можа быць арганізаваная эвакуацыя грамадзян зь месцаў магчымых тэрарыстычных замахаў і разгорнутыя пункты часовага разьмяшчэньня людзей, эвакуаваных зь месца ўчыненьня тэрарыстычнага акту.
Улады Ўкраіны заклікалі грамадзянаў устрымацца ад наведаньня Крыму бяз вострай неабходнасьці, а на ўсіх памежных прапускных пунктах уведзены ўзмоцнены рэжым кантролю.
