Дэмакратычны актывіст з Астраўца Мікола Ўласевіч, які першым абнародаваў інфармацыю пра няштатную сытуацыю на будаўнічай пляцоўцы Беларускай атамнай электрастанцыі, атрымаў адказ з Генэральнай пракуратуры. Па сутнасьці, ведамства абмежавалася традыцыйнай адпіскай, перанакіраваўшы заяву ў структуру, якая найменей зацікаўленая ў агалошваньні падрабязнасьцяў інцыдэнту.
«Адказ з Генэральнай пракуратуры РБ на электронны зварот у сувязі з падзеньнем корпусу рэактара на будаўнічай пляцоўцы Астравецкай АЭС 10 ліпеня не прымусіў сябе чакаць. І мабыць гэта адзінае суцяшэньне ва ўсёй гэтай гісторыі, — гаворыць Мікола Ўласевіч, удакладняючы. — Ні ўзровень адказу, ні, тым больш, яго зьмест мяне не задавальняюць».
Адказ на зварот Уласевіча, які быў адрасаваны на імя Генэральнага пракурора, падпісаў намесьнік начальніка аддзелу па наглядзе за выкананьнем правоў і свабодаў грамадзянаў П.П. Елісееў. У ім службовая асоба суха паведаміла, што заява накіраваная на разгляд у Міністэрства энэргетыкі Беларусі. Акурат ведамства, якое толькі 26 ліпеня прызнала: «няштатная сытуацыя здарылася на пляцоўцы захаваньня корпусу рэактара пры правядзеньні такеляжных працаў па яго перасоўваньні ў гарызантальнай плоскасьці».
У ноч на 10 ліпеня на будаўнічай пляцоўцы БелАЭС адбылося надзвычайнае здарэньне, два тыдні пра якое нічога не паведамлялася. Інфармацыя пра гэта зьявілася толькі 25 ліпеня, і тое ад актывіста Аб’яднанай грамадзянскай партыі Міколы Ўласевіча, які жыве ў суседніх Варнянах і ўдзельнічае ў выбарчай кампаніі.
Ён напісаў у Фэйсбуку, што ня менш за дзясятак незалежных адна ад адной крыніц на ўмовах ананімнасьці падчас правядзеньня пікетаў па зборы подпісаў пацьвердзілі факт абвальваньня рэактара пры яго транспартаваньні. 330-тонны агрэгат сарваўся і зваліўся ўніз з 4 мэтраў. А некаторыя крыніцы сьцьвярджалі, што вышыня была значна большай — блізу 10 мэтраў. У наступныя дні ведамствы ў Беларусі і Расеі спрабавалі давесьці, што нічога надзвычайнага не адбылося і на корпусе рэактара ўсяго толькі «пашкодзілася фарба». Аднак мінуў месяц, а на пляцоўку не дапушчаны ніводзін журналіст, які мог бы на ўласныя вочы пераканацца ў «надуманасьці» перабольшаньняў.
«Мяркую, што камэнтары тут залішнія, — канстатуе Мікола Ўласевіч. — Зварот-скаргу, у якой я ставіў пытаньне аб прыпыненьні будаўніцтва АЭС, далі правяраць таму, хто ўсяляк прасоўвае ў Беларусі будаўніцтва небясьпечнага аб’екту і хто ў дадзеным выпадку будзе прымяншаць ўвесь цяжар магчымых наступстваў надзвычайнага здарэньня».
