Лінкі ўнівэрсальнага доступу

Беларускія турысты спакойна ўспрымаюць надзвычайнае становішча ў Турэччыне


Стамбул, Турэччына
Стамбул, Турэччына

Спроба вайсковага перавароту ў Турэччыне і ўвядзеньне з 20 ліпеня на тры месяцы надзвычайнага становішча ў краіне практычна ніяк не адбіліся на актыўнасьці беларускіх турыстаў.

Як было агучана падчас апэратыўнай нарады ў Міністэрстве спорту і турызму, пасьля няўдалага путчу ў ноч на 16 ліпеня ад забраніраваных тураў адмовіліся прыблізна 2% беларусаў. Але пасьля выходных сытуацыя нармалізавалася і цяпер нават «адказьнікі» просяць вярнуць бронь. «Масавых адмоваў няма», — сказала кіраўніца дэпартамэнту турызму галіновага ведамства Алена Пермінава.

Па яе словах, за апошнія дні супрацоўнікі дэпартамэнту прынялі больш за два дзясяткі тэлефанаваньняў ад тых, хто плянуе адпачынак у Турэччыне. Але пасьля атрыманай кансультацыі ніхто паездку не ануляваў.

Згодна са статыстыкай турапэратараў, летась Турэччына стала самым папулярным кірункам у грамадзянаў Беларусі — на марскіх курортах адпачылі амаль 112 тысяч чалавек. Сёлета гэтая лічба магла быць яшчэ большай: у адсутнасьць турыстаў з Расеі, якім да 1 ліпеня было забаронена выяжджаць у Турэччыну з прычыны шырокамаштабных санкцый за зьбіты туркамі расейскі вайсковы зьнішчальнік, тамтэйшыя апэратары прапаноўвалі найлепшыя варыянты для пражываньня — мінімальныя грошы за максымальны камфорт. Аднак скасаваньне забароны з боку Масквы і нестабільная палітычная сытуацыя ў буйных гарадах ажыятажны попыт крыху скарэктавалі.

Ілюстрацыйнае фота. На пляжы ў Анталіі
Ілюстрацыйнае фота. На пляжы ў Анталіі

Зрэшты, масавага вяртаньня расейцаў на турэцкае ўзьбярэжжа так і не адбылося, таму беларускія турапэратары ўсё ж разьлічваюць на захаваньне станоўчай дынамікі. Прынамсі, як вынікае з супольнага маніторынгу Мінспорту і туркампаній, ад набытых пуцёвак беларусы амаль не адмаўляюцца. Пры гэтым у Мінспорце ўдакладняюць, што кліенты маюць поўнае права перастрахавацца, перагледзеўшы дату на іншую ці выбраўшы альтэрнатыўную краіну. Пры скасаваньні дамовы турыстам мусяць вярнуць кошт пуцёўкі за выняткам фактычных выдаткаў кампаній.

У сваю чаргу, кансалідатары рэйсаў у Турэччыну запэўніваюць, што чартэрныя праграмы будуць выконвацца да таго часу, пакуль няма афіцыйнай забароны на палёты ў гэтую краіну. На дадзены момант усе вылеты ажыцьцяўляюцца згодна з плянам. У кампаніі «Белавія» гэтаксама кажуць, што ніякай інфармацыі адносна згортваньня рэйсаў на іх адрас не паступала. Турэцкія аэрапорты, разьмешчаныя блізу марскіх курортаў, працуюць у штатным рэжыме.

Міністэрства замежных спраў Беларусі таксама не друкавала афіцыйнай забароны на ажыцьцяўленьне тураў на курорты Турэччыны, маецца толькі рэкамэндацыя «ўстрымацца ад паездак да моманту стабілізацыі сытуацыі».

Пры гэтым, што ў Турэччыне, што ў Беларусі, зацікаўленыя бакі не адвяргаюць магчымасьці таго, што сытуацыя ў любы момант можа кардынальна зьмяніцца і турысты пачнуць адмаўляюцца ад набытых пуцёвак. Увядзеньне 20 ліпеня надзвычайнага становішча тэрмінам на тры месяцы сьведчыць, што турэцкія ўлады далёкія ад прызнаньня поўнай перамогі над выклікамі.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG