Афіша:
Роварная вандроўка па менскіх сьцежках Максіма Багдановіча. Пачатак: 18.30 ад помніка М. Багдановічу каля Опэрнага тэатру. Арганізатар — майстэрня экскурсій «Менскі велашпацыр».
У гісторыі:
1869 — нарадзіўся Лявон Вітан-Дубейкаўскі, беларускі архітэктар, пэдагог і грамадзкі дзяяч.
1893 — нарадзіўся Ўладзімер Маякоўскі, расейскі савецкі паэт.
1915 — нарадзіўся Антон Шукелойць, беларускі грамадзкі дзяяч у ЗША. Скончыў аддзяленьне славянскай філялёгіі і этнаграфіі гуманістычнага факультэту Ўнівэрсытэту Стэфана Баторыя (1939). Пасьля далучэньня Заходняй Беларусі да БССР у 1939 годзе Шукелойць працаваў настаўнікам на Ашмяншчыне. Арганізаваў у Ашмянах першую беларускую сярэднюю школу, настаўніцкія курсы і каля 90 беларускіх школ на тэрыторыі былога Ашмянскага павету. Выкладаў беларускую мову ў гімназіі, дзе раней вучыўся сам. У 1940-м стаў дэпутатам Ашмянскага гарадзкога савету, загадчыкам гарадзкога аддзела народнай асьветы і школьным інспэктарам-мэтадыстам Ашмянскага раёну. 23 чэрвеня 1941 арыштаваны органамі НКВД, вызваліўся з турмы ў выніку налёту нямецкай авіяцыі. Падчас нацысцкай акупацыі працаваў у аддзеле асьветы і культуры Менскай гарадзкой управы, затым стаў загадчыкам Беларускага гістарычнага музэя (потым Краязнаўчы музэй). З 1944 году ў эміграцыі. У пачатку 1950-x пераехаў у ЗША. Актыўны ўдзельнік жыцьця беларускай дыяспары ў ЗША. Шматгадовы старшыня Беларуска-Амэрыканскага задзіночаньня, сябра рэдакцыі газэты «Беларус», сябра Беларускага інстытуту навукі і мастацтва ў Нью-Ёрку.
1930 — па абвінавачаньні ў прыналежнасьці да «Саюзу вызваленьня Беларусі» арыштаваны Максім Гарэцкі.
1972 — Івану Мележу і Івану Шамякіну прысвоены званьні народных пісьменьнікаў Беларусі.
1988 — у Віцебску пабудаваны летні амфітэатар. Менавіта тут штогод праводзіцца «Славянскі базар у Віцебску».
1994 — прэзыдэнтам Украіны стаў Леанід Кучма.
У памяці:
1855 — памёр Тамаш Зан, беларускі і польскі паэт-рамантык, удзельнік рэвалюцыйнага руху.
Цытата:
«Толькі ўбачу я Цэліну —
сэрца ў полымі патоне,
соладка ў тую хвіліну,
што даруе лёс Цэліну,
я кахаю, сум пакінуў.
Шчасны, бы кароль на троне!
Толькі ўбачу я Цэліну —
сэрца ў полымі патоне!
Ізабэлька, ты мне люба,
а пабачу — жах! трывога:
мужнасьць дзе мая, дзе згуба?
Хоць ты, золатка, мне люба,
бачыць мілку — сэрцу згуба,
а ня бачыць — мне нязмога,
хоць ты, золатка, мне люба,
а пабачу — жах! трывога.»
Тамаш Зан, «Трыялеты ў Вільні» (пераклад з польскай Васіля Сёмухі)
