Лінкі ўнівэрсальнага доступу

Пачаўся суд у справе аб забойстве вядомай спартоўкі Юліі Балыкінай


Юлія Балыкіна, архіўнае фота

У Менскім гарадзкім судзе пачынаюцца слуханьні па справе аб забойстве вядомай спартсмэнкі Юліі Балыкінай.

6 чэрвеня ў Менскім гарадзкім судзе пачынаецца суд па справе аб забойстве чэмпіёнкі Беларусі па лёгкай атлетыцы Юліі Балыкінай. Абвінавачаньне ў забойстве вядомай спартсмэнкі, учыненым з асаблівай жорсткасьцю, выстаўлена яе былому блізкаму сябру Дзьмітрыю Вішталюку. Таксама яго абвінавачваюць ва ўгоне аўтамабіля і крадзяжы.

Юлія Балыкіна зьнікла ў кастрычніку 2015 году. Па сьлядах, знойдзеных на яе аўтамабілі і ў кватэры, сьледзтва адразу не выключала, што спартсмэнку забілі. Падазрэньне ў злачынстве ўпала на былога сужыцеля спартсмэнкі Дзьмітрыя Вішталюка. Яго арыштавалі, неўзабаве ён прызнаўся ў забойстве, аднак не паказаў дакладнага месца, дзе схаваў цела ахвяры. Больш як праз тыдзень пошукаў, да якіх прыцягнулі вайскоўцаў, цела Юлі Балыкінай знайшлі ў лесе пад Менскам, схаванае пад гальлём у поліэтыленавым меху.

Летась у красавіку, калі справу аб забойстве Юліі Балыкінай перадалі ў суд, у Сьледчым камітэце паведамілі некаторыя падрабязнасьці справы.

«Падчас сваркі на глебе непрыязных адносін абвінавачаны нанёс Юліі Балыкінай 12 удараў малатком, прычым 11 зь іх — па галаве», — распавёў Яўген Архірэеў з управы Сьледчага камітэту па Менску. Паводле Яўгена Архірэева, у момант зьдзяйсьненьня злачынства Дзьмітры Вішталюк быў пад узьдзеяньнем наркотыкаў.

Забойства з асаблівай жорсткасьцю, паводле закону, караецца зьняволеньнем на тэрмін да 25 гадоў, альбо пажыцьцёвым зьняволеньнем, альбо сьмяротнай карай.

Ігар Лосік Кацярына Андрэева Ірына Слаўнікава Марына Золатава Ягор Марціновіч
XS
SM
MD
LG