Лінкі ўнівэрсальнага доступу

У Кіеве пратэстуюць супраць магчымых выбараў у Данбасе


Сваю акцыю «азоўцы» называюць папераджальнай.

Некалькі тысяч прыхільнікаў грамадзянскага руху і палка «Азоў» правялі марш у цэнтры Кіеву пад лёзунгам «Патрабаваньне нацыі — не капітуляцыі!» і цяпер пікетуюць Вярхоўную Раду. Сваю акцыю «азоўцы» называюць папераджальнай.

Яны заклікаюць украінскія ўлады не дапусьціць правядзеньня мясцовых выбараў на акупаваных тэрыторыях Данбасу без папярэдняга раззбраеньня там незаконных узброеных фарміраваньняў і аднаўленьня Кіевам кантролю над мяжой з РФ.

Удзельнікі акцыі трымаюць сьцягі «Азова» і дзяржаўныя сьцягі Ўкраіны. Некаторыя актывісты падпальваюць фаеры. Будынак Рады ахоўваюць ня менш за тысячу спэцназаўцаў паліцыі і Нацыянальнай гвардыі. Яны стварылі тры кардона бясьпекі вакол будынка парлямэнту, відавочна. Пікетоўцы заяўляюць, што штурм Рады не ўваходзіць у іх пляны.

«Калі выбары ў Данбасе пройдуць — мы іх адтуль вынесем!», — так заявіў дэпутат Вярхоўнай Рады, адзін з заснавальнікаў палка «Азоў» Андрэй Бялецкі, прагназуючы лёс дэпутатаў, калі выбары на акупаваных тэрыторыях адбудуцца на ўмовах Расеі. Як падкрэсьліў Бялецкі, выбары ў Данбасе магчымыя толькі ў тым выпадку, калі «ўсходнюю мяжу краіны будуць кантраляваць вайскоўцы ВСУ і ўкраінскія памежнікі».

У АБСЭ напярэдадні паведамілі, што разглядаюць магчымасьць адпраўкі паліцэйскай узброенай місіі ў кантраляваныя сэпаратыстамі раёны Данбасу на пэрыяд правядзеньня там мясцовых выбараў.

Украіна падтрымлівае адпраўку ўзброенай паліцэйскай місіі ў Данбас, а Расея і сэпаратысты выступаюць супраць. Афіцыйны Кіеў ня раз заяўляў, што выбары на непадкантрольных ім тэрыторыях могуць адбыцца толькі пасьля разгортваньня міжнароднай паліцэйскай місіі АБСЭ ў Данбасе, вываду адтуль расейскіх вайскоўцаў і тэхнікі і аднаўленьня ўкраінскага кантролю над усходняй мяжой, паведамляе карэспандэнт Радыё Свабода Ўладзімер Івахненка.

Раней кіраўнік дзяржавы Пётр Парашэнка ня выключыў, што выбары на тэрыторыях непадкантрольных Украіне Данецкай і Луганскай абласьцей могуць адбыцца да канца сёлетняга году. Пакуль невядома, калі Вярхоўная Рада будзе разглядаць адпаведны закон.

Ігар Лосік Кацярына Андрэева Ірына Слаўнікава Марына Золатава Ягор Марціновіч
XS
SM
MD
LG