Верх стрыманасьці: як францускі паліцыянт адрэагаваў на напад пратэстоўцаў з палкамі. ВІДЭА

У сераду ў Парыжы здарыліся чарговыя сутыкненьні паліцыі з дэманстрантамі. Супрацоўнікі праваахоўных органаў меліся правесьці мітынг, каб выказаць незадаволенасьць няспыннымі сутыкненьнямі з агрэсіўнымі ўдзельнікамі пратэстаў супраць рэформы працоўнага заканадаўства. За апошнія тыдні больш за тры сотні паліцыянтаў атрымалі раненьні. Відэа аднаго з інцыдэнтаў публікуе Now This. Пратэстоўцы разьбіваюць задняе шкло паліцэйскай машыны, закідваюць туды нейкі прадмет і працягваюць біць машыну палкамі. Паліцыянт выходзіць з машыны і вытрымлівае чатыры ўдары палкай, стоячы на месцы. Затым стрымана адыходзіць ад машыны, якая ўжо пачынае дыміцца. Пазьней адна з паліцэйскіх машынаў, у якую пратэстоўцы закідвалі аналягічны прадмет, загарэлася. Паліцыянты выбраліся з аўто, машынай заняліся пажарныя.