«Перакананы, што пажару не было. Гэта горнае сяло, там нават калі 50 тонаў бэнзіну прынесьці, дык як можна спаліць дом, складзены з каменьня?» — заявіў Карымаў у інтэрвію «Газете.ру».
Пра падпал дома Рамазана Джалалдзінава паведаміла ягоная жонка. Яна распавяла, што ў ноч на 13 мая людзі ў масках зайшлі ў іх дом, пасадзілі яе і дзяцей у машыну, пасьля чаго «кінулі іх пад мостам». Сам дом нападнікі падпалілі. «Жыхарам вёскі забаранілі гаварыць на гэтую тэму, прыстрашыўшы падпалам іх дамоў», — удакладніла жонка Джалалдинова.
Сам Джалалдзінаў распавёў тэлеканалу «Дождж», што перад падпалам хаты да яго прыйшоў начальнік МУС па Шаройскім раёне Мусьлім Ісаеў. Паводле яго, Ісаеў асабіста вывеў яго сям’ю з дому. «Ён сказаў, што калі Рамазан Джалалдзінаў ня прыйдзе і ня будзе стаяць на каленях перад Кадыравым, дык з кожным кенхійцам будзе тое самае», — заявіў Джалалдзінаў.
Старшыня расейскага Камітэту па прадухіленьні катаваньняў Ігар Каляпін у інтэрвію «Адкрытай Расеі» назваў падпал дому Джалалдзінава «дзяржаўным тэрарызмам».
У сваім відэазвароце да прэзыдэнта Рамазан Джалалдзінаў на фоне паўразбураных дамоў і вуліц, якія патрабуюць рамонту, распавёў пра тое, што за ўсе гады мірнага жыцьця пасьля другой чачэнскай вайны фэдэральныя грошы так і не дайшлі да вёскі. За любыя субсыдыі з Масквы людзей прымушаюць плаціць чыноўнікам «адкаты» памерам траціны сумы.
Неўзабаве пасьля таго, як відэазварот да прэзыдэнта быў апублікаваны, кіраўнік Чачні Рамзан Кадыраў заявіў, што ўся выкладзеная Джалалдзінавым інфармацыя — хлусьня. 1 траўня 56-гадовы чачэнец паскардзіўся на Кадырава генпракурору Расеі Юрыю Чайку.
Рамазан Джалалдзінаў пакінуў Чачню, баючыся перасьледу, і цяпер знаходзіцца ў Дагестане.
